Datamik atuineq qaffariarujussuartoq
Tele Greenlandimi datamik atuinerup annertuumik qaffariarnera 2018-imi nalaanneqarpoq.
Internet aqqutigalugu kalaallit aliikkusersorneruleriartuinnarput imaluunniit attaveqarneruleraluttuinnarput. 2017-imit 2018-imut datamik atuioneq 108 procentinik qaffariarpoq.
- Internetimik atuinerup qaffariarnera naatsorsuutigineqareerpoq, taakkunannga TV-mik streamerinermut aamma videonut atorneqaleriartormat. Atuinerup suli qaffasinnerulernissaa suli naatsorsuutigineqarpoq, kisianni malunnaatilimmik annikinnerusumik, internetimik atuisut amerlanerpaartaat maanna internetimik flatratemik nioqquteqarfiusumiimmata. Tamanna atuisuni immap naqqatigut kabelimik tallineqarnikuniittuni tamanna takuneqarsinnaavoq, taakkunani atuineq ukioq 2018 tamakkerlugu 421 procentinik 2017-imut sanilliullugu qaffariarfiupput, 2018-imut naatsorsuutinut nalunaarummi ingerlatseqatigiiffiup saqqummiuteqqammisaani tamanna atuarneqarsinnaavoq.
Immap naqqatigut kabelip tallineqarnera
Immap naqqatigut kabelip Nuummit Qeqertarsuup Tunuanut tallineqarnera naatsorsuutinut aamma atuisut atuinerisa allanngornerannut sunniuteqarluarpoq.
Tassami ADSL-imik atuisut 10 procentinik amerleriarsimapput.
- Immap naqqatigut kabelip tallineqarnerata aamma Tusass internetip siammarterneqarnerata ersarissumik tamanna kinguneraa. Sumiiffinni taakkunani 14-iusuni internetimik atuineq 25 procentinik 2018-ip ingerlanerani qaffariarpoq. Akerlianik qaammataasatigut attaveqarfiusuni sinneruttuni internetimik atuineq 10 procentinik appariarpoq, ingerlatseqatigiiffik ilisimatitsivoq.
Telefonit atorunnaangajalersut
Ingerlatseqatigiiffik amerlasuutigut allanngulerfimmiippoq, atuisut digitaliusumik aaqqiissutit toqqartalermatigit.
Tassami allakkanik nassiussisarnerit 6 procentimik ikileriarput, poortukkallu amerlassusaat 14 procentinik qaffariarlutik, nunani allani nittartakkakkut pisiniarfinnut pisiniarnerusalerneq pissutaalluni.
Telefonimik atuisut 15 procentinik ikileriarput, kiffartuussinerup taassuma atorunnaarsikkiartornissaa aatsaat ukiut arlaqanngitsut qaangiuppata piumaartoq, ingerlatseqatigiiffik ilisimatitsivoq.