Demokraatit EU-p Canadamut isumaqatigiissuteqarnera ernumassutigaat

EU-p Canadallu killeqanngitsumik niueqatigiinnissamut isumaqatigiissut CETA sapaatiummat atsiorpaat. Isumaqatigiissut illuatungeriit niuerfiinut killeqanngitsumik ammaassisuuvoq.

Aalisakkat akii appariartornissaat ernummatigigaa
Justus Hansenip (D) isumaqatigiissut Nunatsinnut qanoq sunniuteqassanersoq, Naalakkersuisunit maanna akissutisiffigerusuppaa. Isumaqatigiissut raajat aamma qalerallit akiinik appartitsinissaa, taassuma ingammik ernumassutigaa.

Tamanna § 37 naapertorlugu apeqqummi nassiuteqqammisaani atuarneqarsinnaavoq.

Sulisitsisut ernumasut
Sulisitsisut (GE) aamma isumaqatigiissut siornatigut oqaaseqarfiginikuuaat. Sulisitsisut pisortaat Brian Buus Pedersen KNR-imut oqarnikuuvoq, CETA nutaarsiassatsialaanngitsoq, taassuma Canadamiut aalisakkanik nioqquteqarsinnaanerannik ajornannginnerulersitsinera pissutigalugu.

Kalaallit Nunaat EU-mut isumaqatigiissummik, immikkut ittumik niuerfimmut ammaassisumik iluaquteqarpoq.

- Imaappoq Danmarkip/Kalaallit Nunaatalu EU-mut illugiilluni niueqatigiinnissamik isumaqatigiissutaat soorunami nalikinnerulissaaq, Brian Buus Pedersen KNR-imut oqarpoq.

Atuaruk: EU-p Canadallu niuernermut isumaqatigiinninniarnerat unittoorpoq

Kingunissat pinngitsoortinneqarnissaat
Justus Hansenip CETA qanoq kinguneqartitsinissaa kisiat soqutigisarinngilaa. Taassuma aamma siullermik kingunissat pinngitsoortinneqarnissaat soqutigisaraa.

- Naalakkersuisut qanoq suliniuteqarniarpat CETA Kalaallit Nunaat raajanik aalisakkanillu avammut tunisassiorneranut ajortunik kinguneqannginnissaa piniarlugu, Canadamut unammillernerput aamma eqqarsaatigalugu, ilaatigut taama aperivoq.

Piviusoq nutaaq
Naalakkersuisut sukkanerpaaq atorlugu, avammut niuernermi isertitat amerlasuut Kalaallit Nunaata annaanissaanut sillimallutik piareersartariaqartut, Justus Hansen isumaqarpoq.

- CETA-p kingunerisaanik piviusumut nutaamut pilersumut, Naalakkersuisut iliuuseqartariaqarlerput, tunngavilersuinermini taanna allappoq.