DIH: Illoqarfimmiunut suliassarpassuaqassaaq
Peqqinnissaqarfiup illussanik titartaasarfik tusaamasaasoq C.F. Møller Dronning Ingridip Napparsimmavissuata nutarterneqarnissaanut allineqarnissaanullu atatillugusuliassap pingaarnersaatigut pilersaarusiornermut siunnersuinissamullu suliaqartussatut toqqarsimavaa.
Suliassaq 2005-imi C.F. Møller-imut suliassanngortinneqarpoq. C.F. Møller napparsimmavissualiornernik allanik suliaqartareersimavoq, assersuutigalugu Århus-imi universitetshospital-i nutaarsuaq 250.000 kvadratmeterinik angissusilik 2007-imi aallartinneqartoq Danmarkimi nunanilu allani napparsimmaviit suliarisimavaa.
- Napparsimmavik tamaat allanngortissagaanni suliffeqarfik napparsimmavinnik sanaartornermi misilittagaqarluartoq atortariaqarpoq. Napparsimmavimmi periaatsit ilisimasaqarfigissavai, assersuutigalugu napparsimasut agguaqatigiisillugu aqqusaartartut qanoq amerlatiginersut, immikkoortortani ataasiakkaani akornannilu suleqatigiinneq aammalu immikkoortortanut nutaanut qanoq inissaqartitsilersinnaanersoq.
- Misissuiffigeqqissaagassat taamaattut suliffeqarfiit nunani allaniittut annertuumik misilittagaqarfigalugillu immikkut ilisimasaqarfigaat, aamma C.F. Møller pineqartumut tunngatillugu ajunngitsumik naammassisaqartarsimavoq, Søren Rendal oqarpoq.
Naallu qallunaat suliffeqarfiutaata suliaq 450 mio. kr.-inik nalilik suliarilereeraluaraa imaanngilaq entreprenørinut siunnersuisartunullu illoqarfimmiunut suliassaqarnavianngitsoq, Søren Rendal neriorsuivoq.
ilaatigut siunnersuisarfiup INUPLAN-ip pisortaata Kristian Lennertip Sermitsiakkut isornartorsiorpaa, sanaartugassani annertuuni kalaallit nunaanni siunnersuisartut qaangiinnarneqartartut, isumaqarpoq sanaartugassat nunanut allanut "tunniutiinnarneqartartut".
- Suliassat appasinnerusumiittut nunap iluani suliarinnittussarsiuunneqartussaapput, kalaallillu suliffeqarfiit neqerooruteqarnissamut tikilluaqquneqarput. Sanaartugassaqaaluppoq, isatigassaqaaluppoq, nunamillu assaasoqartussaalluni. Taamaattumik nunap iluani siunnersuisartut entreprenørillu atorfissaqartinneqassapput, Søren Rendal oqarpoq.
Taassuma ilannguppaa nunami najukkami suliffeqarfiit atoraanni iluaqutissaqartaqartoq.
- Sanaartugassartaanni suliassanut nunat allamiut suliffeqarfiisa atornissaat soqutigisarinngilarput. Tamanna ajornakusoortuullunilu akisussaaq, Søren oqarpoq.
Suliassap immikkuualuttuini suliassat suliarinnittussarsiuunneqarnissaat kikkut suliarissaneraat suli ilisimaneqanngilaq.
- Suli aalajangersarneqanngilat suliassat taakkortaat C.F. Møllerip imaluunniit peqqinnissaqarfiup suliassarissanerai, Søren Rendal oqarpoq.
DIH-mi suliassaq aasaru aallartinneqassaaq.