Disko Line isornartorsiuinermut akissuteqartoq: Marlunnik sammiveqartumik niuerpugut

Disko Line A/S 2004-mi pilersinneqarpoq, tamatumalu kingorna ukiuni qulini kiffartuussinissamut Namminersorlutik Oqartussanut isumaqatigiissut 270 million koruuninik nalilik tunngavigalugu Qeqertarsuup Tunuani, Kalaallit Nunaata qeqqani Kujataanilu angallassisarluni Kalaallit Nunaanni ilaasunik angallassisartuni annersaalerpoq.

Maannakkut Sermitsiami allaaserineqartumut qisuariarput, tassani Kommune Qeqertalimmi Avannaata Kommunianilu politikerit nuimasut arlallit umiarsuaatileqatigiiffik takornariartitsinermut tunngasunik suliaqarnera pillugu sakkortuumik isornartorsiorpaat, isumaqaramik tamanna unammillernermik naligiinngiffiusumik pilersitsisoq, pingaartumik takornariartitsisartunut minnernut, pisortanit aningaasaliiffigineqanngikkaluarlutik aamma ilaasunik ikitsunik angallassisartunut.

Tamanut iluaqutaasoq 

Kalaallit Nunaanni angallannermi takornariaqarnermilu inissisimaffitsik pillugu ammasumik piviusorsiorlunilu oqaloqatigiinnissamut peqataarusullutik Disko Line A/S-imi niuernermut pisortap, Nóelle Simoudip, erseqqissarpaa.

- Tusagassiuutitigut kingullermik saqqummiunneqartoq eqqarsaatigalugu Disko Line marlunnik ingerlatsisoq, tassa Namminersorlutik Oqartussanut kiffartuussinissamik isumaqatigiissut malillugu angallassinermik ingerlatsisoq aamma takornariartitsisartoq angallatinillu attartortitsisartoq erseqqissaatigissavarput.

- Taamatut aaqqissuussineq tamanut angallassinermik allanngujaatsumik qulakkeerinnittuullunilu takornariaqarnerup ineriartorneranut tapersersuivoq. Takornariarpassuit nunap ilaanut pineqartumut tikeraartartut taamatuttaaq sullissinernut neqeroorutigisinnaasatsinnut tunngavileeqataammata tamanna kikkunnut tamanut iluaqutaassaaq, taanna oqarpoq.

Taanna naapertorlugu tamanna naleqqussarsinnaanermik, angallanneqarsinnaanermik aningaasatigullu piujuartitsinermik kinguneqarpoq, tamannalu aamma inuiaqatigiinnut umiarsuaatileqatigiiffiup kiffartuussisartagaanut iluaqutaavoq.

Unammillerneq isornartorsiuernerlu ilisimagaat 

Kiffartuussinissamik isumaqatigiissut maanna atuuttoq, Qeqertarsuup Tunuanut tunngasoq ilanngullugu, 2030-p naanissaata tungaanut atuuppoq.

- Suliffeqarfiit arlallit isumaqatigiissutinut neqerooruteqarumallutik soqutiginninnertik ersersikkaat nalunngilarput. Ammasumik unammillertumillu ingerlatsinermi tamanna pissusissamisoorpoq, tamannalu ataqqivarput.

- Namminersorlutik Oqartussat kisimik aalajangiisinnaatitaammata kikkut neqerooruteqassanersut imaluunniit uagut neqerooruteqartitsinissamut qanoq isiginnittaaseqarnersugut Disko Linep oqaatigiumanngilaa, Noélle Simoud oqarpoq.

Piffissami kingullermi Disko Linep takornariartitsinermik ingerlatsinera pillugu isornartorsiuinerit ilisimallugit aammattaaq erseqqissarpaa.

- Topas Travelimik aamma Disko Line Explorerimik suleqateqarnerput pillugu isornartorsiuinerit eqqumaffigaavut. Attartortitsinerput kiffartuussinissamut isumaqatigiissutitsinnut akerliunngitsoq erseqqissaatigissavarput. Akerlianik umiarsuaatitsinnik pitsaasumik atuinissamut qulakkeerinnittuullutillu aningaasatigut ataatsimut isigalugu piujuartitsinermut tapersiipput, taanna naqissusiivoq.

Disko Linep umiarsuaatini attartorneqartut tamaasa pillugit ingerlaavartumik paasissutissiineq ajorput, Noelle Simoudilu naapertorlugu tamanna ilaasunut inuiaqatigiinnullu iluaqutaasarmat amerlanerusunik angallateqarnikkut angallannermi nalaatsornikkut pisunut sukkasuumik eqaannerusumillu qisuariarsinnaalersitsisartut, erseqqissaatigaat.

Attartortitsisartut  

Disko Linep umiarsuaatitik Qeqertarsuup Tunuani juunimi attartorneqarsimasut uppernarsarpaa, tamannali niuernermut tunngasuummat qassiuneri oqaatigiumanngilaat.

- Suliat tamarmik kiffartuussinissamik isumaqatigiissut naapertorlugu pisussaaffivut pingaarnerit eqqarsaatigalugit pilersaarutigineqarput. Atuisut, najukkami ingerlatsisut kommunimilu oqartussaasut suleqatigilluarnerunissaat Disko Line A/S-ip kissaatigingaarpaa.

- Tamatumunnga atatillugu siunissami oqaloqatigiittarnerit – ingammik inuit attaveqaqatigiittarfiisigut – piviusunik ataqqeqatigiinnermillu tunngaveqarnerulissasut neriuutigaarput, Noélle Simoud oqarpoq nunallu immikkoortuani ineriartornermut iluaqutaasumik tapersersuinissartik anguniarniarlugu, aamma unammilligassat periarfissallu ataatsimut atuuttut pillugit ammasumik ataqqeqatigiinnermillu oqaloqatigiinnissaq qilanaarigitsik erseqqissarpaa.

Uggorigaat 

Disko Linemi aqutsisut umiarsuaatileqatigiiffiup sulisuminik, ilaatigut umiartortunik, akissarsiakitsinermik sivisuallaamillu sulinermik atornerluisimanera pillugu pasilliutit atuarlugit tusaallugillu uggoraat.

- Sulisut atugarissaarnissaat sulinerminnilu atugassarititaat pingaartingaarlugillu soorunami isumaqatigiissutit maleruagassallu atuuttut maleruarpagut. Sulisut suliffeqarfitsinni tunngaviupput, suliaallu pingaartippagut – aamma piffissami ulapaarfiusumi.

- Nunaqavissut umiarsuaat umiarsualivinniiginnartut Disko Linep umiarsuaatai imaani immikkut malunnaateqartartut tamanut ammasumik oqallinnermi oqaatigineqarsimasoq maluginiarparput, Noélle Simoud oqarpoq.

Disko Linep umiarsuaasa amerlanersaat piffissani makkunani Namminersorlutik Oqartussanut kiffartuussinissamik isumaqatigiissut malillugu angallassisartut maluginiarnartoq naggataatigut oqarpoq.