Disko Line
A/S Qeqertarsuup Tunuani, nunatta qeqqani kujataanilu ukiuni qulini atuuttumik
Namminersorlutik oqartussanik sullissinissamik isumaqatigiissuteqartoq, nunap
immikkoortuani angallassinermik takornarianullu attaveqaatini pingaarutilimmik
ingerlatsisuuvoq.
Ingerlatseqatigiiffiup aamma takornariartitsinermut
immikkoortoq Disko Line Explorerimik taaguutilik, Qeqertarsuup tunuani
misigisassarsiornermik neqerooruteqartoq ingerlappaa.
Disko Line
A/S Qeqertarsuup Tunuani, nunatta qeqqani kujataanilu ukiuni qulini atuuttumik
Namminersorlutik oqartussanik sullissinissamik isumaqatigiissuteqartoq, nunap
immikkoortuani angallassinermik takornarianullu attaveqaatini pingaarutilimmik
ingerlatsisuuvoq.
Ingerlatseqatigiiffiup aamma takornariartitsinermut
immikkoortoq Disko Line Explorerimik taaguutilik, Qeqertarsuup tunuani
misigisassarsiornermik neqerooruteqartoq ingerlappaa.
Kujataani
ingerlatseqatigiiffiutaa Blue Ice Explorer tamakkiisumik akiliilluni
angalanerni takornarianillu misigisassarsiortitsinermik ingerlatsivoq.
Ingerlatseqatigiiffiit pingasut tamarmik – Disko Line, Disko Line Explorer
aamma Blue Ice Explorer – suliffeqarfissuup Topas Explorer Group ApS-p
ataaniipput, Noélle Simoudilu, Disko Linemi Commercial Directoriusoq
naapertorlugu, ataatsimut Kalaallit Nunaanni piujuartitsisumik
takornariartitsinermik assartuussinermillu ineriartortitsinermik suliaqarput.
Nunanillu
allanit takornariat takornariartitsisartunit taakkunannga ataatsimut
akilerlugit angalanernik pisisunik, Disko Linep angallataanik, aamma ilaasunik
angallassisunik atuisarput. Taamaalilluni Disko Line marlunnik
toqqammaveqarpoq, siulleq tassaalluni namminersorlutik oqartussanik
isumaqatigiissuteqarluni ilaasunik angallassineq, aappaalu tassaalluni
attartortitsineq takornariartitsinerlu, Disko Line A/S nalunaarpoq.
Aqqa
Samuelsenili, Siumut, Kommune Qeqertalimmi kommunalbestyrelsimi ilaasortaq
isumaqarpoq, Disko Linep namminersorlutik oqartussanut ilaasunik
angallassinermik sullissinissamut isumaqatigiissummik takornariartitsinermillu
suliffeqarfimmik avissaartitsisariaqartoq, isumaami naapertorlugu tamanna
piffinni takornarialerinermik ingerlatsisunut naligiinngitsumik
unammilleqatigiinnermik pilersitsivoq.
Ilaasunik
angallassineq sunnerneqanngitsoq
Noélle
Simoud naapertorlugu Disko Line A/S angalatitseqatigiiffinnik arlalinnik
suleqateqarpoq, tassani Topas Travel, ilaatigut Qeqertarsuup tunuanut nunattalu
sinneranut tamakkiisumik akiliilluni angalanernik neqerooruteqartartoq
ilanngullugit. Taamaattoq takornariat qanoq amerlatigisut Disko Linep
angallataanik ilaasunik angallassinermut atorneqartartunut angalasarnersut
paasissutissiissutigiumanngilaa.
- Kalaallit
Nunaannik soqutiginninneq annertusiartortoq misigaarput, aallaavittulli
suleqatigisavut pillugit kisitsisinik aalajangersimasunik paasissutissiineq
ajorpugut.
- Angallataatigut
namminersorlutik oqartussanik sullissinissamik isumaqatigiissut naapertorlugu
tamani ilaasunik angallassinermut, tamatumalu saniatigut attartortitsilluni
angallassinernut atortarpagut. Taamatut takornarianik angallassineq ilaasunik
nalinginnaasumik angallassinermut sunniuteqartinnagu pilersaarusiorneqarlunilu
ingerlanneqartarpoq, taanna oqarpoq.
Peqatigisaanik
sullissinissamik isumaqatigiissut angallatinik toqqammaveqannginnera,
piffinnilli assigiinngitsunit allarlunilu tikittarnissat minnerpaaffissaanik
toqqammaveqarnera, piumanninnerlu naapertorlugu ingerlaarfissaminnik
pilersaarusiorlutillu pitsanngorsaasarlutik, ilanngullugu erseqqissaatigaa.
- Oqareernittut
ingerlaartarnitsinni piumanninneq tunngavigisarparput – tamanna qanoq
akulikitsigisumik ullumi sapaatilluunniit akunnerani pineqartumi
ingerlaarfinnik angalassinnaasarnitsinni pingaarutilimmik inissisimavoq, Noélle
Simoud erseqqissaavoq.
Disko Line
aamma piffinni takornariartitsinermik sullissisunik arlalinnik suleqateqarpoq.
- Suleqatigiinnerit
taakku iluarisorujussuusavut nunatta qeqqani kujataanilu aalaakkaasumik
tutsuiginartumillu ingerlaarsinnaanitsinnut pingaaruteqarput, taanna oqarpoq.
Taanna
naapertorlugu piffinni suleqatit nunap immikkoortuani attaveqarnermilu
pissutsinik annertuumik ilisimasaqarput, Disko Linellu ilaasuisa
toqqissisimanartumik pisariinnerpaamillu apuuffissaminnut anngunnissaannik
qulakkeerinninniarnermi pingaarutilimmik inissisimallutik.
Takornariartitsinermik
ingerlatsinissamut periarfissaq
Disko Linep
takornariartitsinermut immikkoortua Disko Line Explorer, nittartakkakkut
quppernermi www.diskoline.gl-imiippoq, tassanilu ilaasut billetinik
pisisinnaapput, Noélle Simoudillu nunap immikkoortuani takornariartitsinermik
assartuinermillu aaqqissuussinermut isummat assigiinnginneri eqqumaffigigini
oqaatigaa.
- Paasiuminartuunissaa
sullitanillu sullissineq pissutigalugu Disko Linep taakku ataatsimoortinnissaat
qinerpaa. Ersarissuutitsinissaq anguniarparput. Nittartakkakkut quppernivut
nutarterneqartuarput, nittartakkakkullu quppernermi angallassineq sammineqarpoq.
Ingerlaavartumik pitsannguinernik ingerlataqarnerput tamatuma kinguneraa,
taamaalilluni billetinik pisineq angalanermullu tunngasut atuisunut
pisariinnerpaatinniarneqartarlutik.
- Disko
Linep taamaallaat sullissinissamik isumaqatigiissummik sulianik
ingerlataqannginnerata erseqqissarnissaa pingaaruteqarpoq. Suliffeqarfittut
aamma takornariartitsinermut sammisunik ingerlataqarpugut, tamannalu arlalinnik
angallataateqarlutalu umiarsuaateqarnitsigut eqaannersumik patajaannerusumillu
umiarsuaateqarnitsinnut ilapittuisuuvoq, taanna oqarpoq, tamannalu ingammik
teknikikkut unammilligassaqalersillugu iluaqutaasoq erseqqissaatigaa, tamannalu
ilaasunut piffinnilu inuiaqatigiinnut iluaqutaasumik aalaakkaasumik
ingerlatsinermik qulakkeerinnittarpoq.
Nunap
immikkoortuani siunissami takornariartitsinerup annertusiartornissaa
naatsorsuutigisallu iliuuseqarfigiumallugit nukiit tamarmik
pisariaqartinneqartut, Disko Linep pisortai isumaqarput, taamatullu
ineriartornermut pitsaasumik ikorfartuinissaq ilapittuinissarlu
umiarsuaatileqatigiiffiup suliassamisut isigaa. Disko Linep namminersorlutik
oqartussanik sullissinissamik isumaqatigiissutaa 2030-p naanerani
atorunnaassaaq, neqerooqqissinnaanermullu umiarsuaatileqatigiiffiup
oqaaseqarnissaanut suli siusippallaarpoq,
suliarli qanimut malinnaaffigalugu, piffissarlu qallippat tamanna
isummerfigissallugu, Noélle Simoud oqarpoq.
Disko
Linemik isornartorsiuineq
Aqqa
Samuelsen, Siumut sinnerlugu Kommune Qeqertalimmi kommunalbestyrelsimut
ilaasortaasoq, Disko Linep takornariartitsinermut suliat pinnagit piffinni
inuiaqatigiit annertunerusumik
pingaarnerutittariaqarai isumaqarpoq.
- Qeqertarsuup
tunuani piffinni inuiaqatigiit sinnerlugit Disko Linep takornariartitsinermi
angisoorsuanngorsimanera eqqumaffigiumavarput, tamannalu ajornartorsiutaavoq.
Piffinni najugaqartut naammattumik pingaarnerutinneqarneq ajorput,
ingerlaarfiillu piffissanik takornariartitsiffinnik takornariallu
pisariaqartitaannut nalimmassarneqarnerusarnerat misigisarpaat, taanna oqarpoq.
- Nunap
immikkoortuani najugaqarfigisatsinni Disko Line pingaarutilimmik inissisimavoq.
Issittumi pissutsit patsisigalugit attaveqaateqarnikkut unammillernartoqarnera
ilisimaaraarput, qanorli sullissinerup maani najugaqartunut pitsaanerusumik
nalimmassarneqarsinnaanera oqaloqatigiissutigerusupparput, Aqqa Samuelsen
oqarpoq.
Maanna
naalakkersuisooqatigiit Demokraatit, Inuit Ataqatigiit, Siumut Atassutillu
naalakkersuisooqatigiinnermut isumaqatigiissutaat naapertorlugu angallassinerup
nutaamik aaqqissuunneqarnera tunuliaqutaralugu, sullissinissamik
isumaqatigiissutit piffinni najugaqartunut iluaqutsiisumik nutarternissaat
siunertaralugu qissimigaarneqassapput, tamatumalu saniatigut sullissinissamik
isumaqatigiissuteqarfigineqartut takornariartitsinermi kiisalu sullissinernut
allanut tunngatillugu angallatinut namminersortunut unammillinnginnissaat
pingaartinneqassaaq.
