Disko Linep misissuiffigineqarnissaa Avannaata Kommunianit piumasarineqartoq

Takornariartitsisartut qallunaat angalanermik ingerlatsiviisa Topas Explorer Group ApS-ip ataaniittut Topas Travelip, Disko Line Explorerip aamma Blue Ice Explorerip Kalaallit Nunaanni takornariartitsisarnermi sunniuteqarluartut ilaasunik angallassisartut Disko Line A/S qanimut suleqatigaat.

Taamaalilluni Disko Line, ilaasunik nassiussanillu assartuinermut Naalakkersuisunut ukiuni qulini kiffartuussinissamik isumaqatigiissuteqartoq, Kalaallit Nunaanni takornariartitsisarnermi qitiusumik inissisimalerpoq.

Tamanna takornariartitsisarnermi naligiinngitsumik unammillernermik pilersitsivoq, taamaattumillu Naalakkersuisut Disko Linep takornariartitsisarnermi inissisimaffia qulaajartariaqaraat Avannaata Kommuniani borgmesteri Siumumeersoq Lars Erik Gabrielsen aamma parteeqataa Ujuut Olsen, Avannaata Kommuniani kommunalbestyrelsimi takornariaqarnermut ataatsimiititaliami siulittaasoq taama isumaqarput.

Ajornartorsiutaasoq 

Ilulissani Qeqertarsuullu Tunuanilu takornariartitsinerup ukiuni kingullerni siuariartornera aningaasaqarnikkut inuiaqatigiinnilu ineriartornissamut periarfissaqarluartoq Lars Erik Gabrielsen oqarpoq. Aammali inuiaqatigiittut ineriartornerup qanoq aqunnissaanut piumasaqaammik nassataqartoq.

- Takornarialerineq imminut akilersinnaassappat takornariartitsisartut tamarmik, angisuut mikisullu, naligiimmik periarfissaqartariaqarput.

- Nunaqavissut aallarnisaasorpassuit ukiuni arlalinni suliffiutiminnik ineriartortitsisinnaasarput. Takornariaqarnerpaaffiani saniatigooralugu aallartissutigineqakkajuttarpoq. Piffissarmi takornariaqarfiunerpaasartoq sivikippoq, ukiullu sinneranut isumalluutit killeqarnerat pissutigalugu tunngavissaqarniarneq ajornarsinnaasarpoq.

- Taamaattumik imminut napatittumik takornarialeriffiuteqassagaanni sapiissuseqarnissaq, piumassuseqarnissaq naammagittarsinnaanerlu pisariaqarput, oqarpoq.

Suliffeqarfiit pisortanit aningaasaliiffigineqartartut illoqarfimmi takornariartitsisartunut unammillernerat borgmesterip aamma ajornartorsiutitut isigaa.

- Assersuutigisinnaavarput Disko Line. Taakku illoqarfiit nunaqarfiillu akornanni angallassinermut pisortanit aningaasaliiffigineqartarput, takornariartitsinermulli unammillertaallutik. Tamannalu ajornartorsiutaangaarpoq. Umiarsuaatileqatigiiffiup umiarsuaatai takornariartitsinermut atorneqaraangata namminersortutut ingerlatsisunit allaanerulluinnartunik atugassaqartinneqarlutik takornariartitsinermut niuernermut isertarput.

- Akunnittarfimmi Hotel Arcticimi misigisassarsiortarfinnilu World of Greenlandimi, tamarmik Namminersorlutik Oqartussanit pigineqartut, aamma taamaappoq.

- Takornariartitsinermut iliuuseqartorujuunikuupput, pissutsilli maanna allanngornikuupput. Ilulissani takornarialerineq ima siuarsimatigaaq namminersortut akisussaaffeqarnerusariaqaraluarlutik, Lars Erik Gabrielsen oqarpoq.

Taassuma takornarialerinermi nunaqavissut suliffeqarfiillu ineriartornermut piginnittutut misiginissaat pingaartippaa, isumaqarporlu taamaaliornissamut politikkikkut pisortat qanoq annertutigisumik takornariartitsinermi peqataasinnaanersut aalajangerneqartariaqartoq.

Naligiimmik periarfissaqartitsineq 

Borgmesterip, takornariartitsisartut nunanit allaneersut soorlu Topas Travel aamma Albatros Travel – Qeqertarsuup Tunuani, pingaartumik Ilulissani, takornariartitsisarnermi ukiuni kingullerni suliaqarluartut – unammillernermik naligiinngitsumik pisutut sakkortuumik isornartorsiortarnikuuai. Taamaattumik Naalakkersuisut takornariaqarnermut inatsit suliarineqarnerani takornariartitsisartut ineriartornerat eqqarsaatigineqartariaqartoq kaammattuutigaa.

- Pisortat aningaasaliissutaasa atorunnaarsinnissaat pineqanngilaq, najukkami ingerlatsisut suleqatigalugit aningaasaleeqataanissaat qulakkeerneqassaaq. Takornarialerisullu ataasiakkaat pinnagit ataatsimut isigalugit nukittorsarneqarnissaannik pingaartitsisumik ingerlatsisoqassalluni.

- Najukkami ineriartorneq, namminersortut piujuartitsinerlu anguniarlugit innuttaasuvut tatigisariaqarpavut. Amerlasuut piginnaasaqarput piumassuseqarlutillu – naligiimmik periarfissaqartinneqartariaqarput. Pissutsit maanna atuuttut najukkami takornariartitsisartut suli aallartilluanngitsut ineriartornerat unitsissinnaavaat, oqarpoq.

Nunaqavissut aallaavigalugit takornariartitsinerup inuiaqatigiinni ineriartortitsisinnaanera atugarissaartitsisinnaaneralu aatsaat qulakkeerneqarsinnaasoq Borgmesteri Lars Erik Gabrielsen isumaqarpoq.

Qulajaanissaq pisariaqartoq 

Takornariaqarnermut ataatsimiititaliap isumaqatigiittup takornariat Disko Line Explorer, Blue Ice Explorer aamma Topas Travel aqqutigalugit Kalaallit Nunaannut angalaniarlutik pisisut Disko Linemit umiarsuaanillu kiffartuunneqartarnerat ajornartorsiutitut isigigaat Avannaata Kommuniani takornariaqarneq pillugu ataatsimiititaliami siulittaasup Siumumeersup Ujuut Olsenip erseqqissarpaa.

- Najukkami angallassisartut allat, pisortanit ilaasunik angallassinissamut aningaasaliiffigineqanngitsut, Disko Linetut pissarsinissamut periarfissaqanngillat.

- Tamanna naligiinngitsumik unammillernermik pilersitsivoq, taamaattumillu Disko Linep takornariartitsinermi inissisimaffia qulaajarneqassasoq Naalakkersuisunut piumasaraarput, oqarpoq.

Disko Line Qeqertarsuup Tunuani, Qeqqani Kujataanilu assartuinermut takornariaqarnermullu attaveqarnermut qitiusumik suliaqartuusoq Disko Linemi niuernermut pisortaq Noélle Simoud juunimi Sermitsiamut oqarpoq. Aamma Disko Line kiffartuussinissamik isumaqatigiissut malillugu kiffartuussiinnarani takornariaqarnermut tunngasunik aamma ingerlatsisinnaasoq erseqqissarpaa.