Savalimmiut
Eik Bank akileraarutitigut peqquserlunnerarpaa
Eik Bankip paasissutissat isertuuppai savalimmiunilu landskarsi 90 millioner koruuninik annaasaqartillugu. Taamatut oqarpoq Eik Bankimi pisortaasimasoq siulersuisunullu ilaasortaq Jørn Astrup Hansen
Eik Bankimi pisortaasimasup siulersuisunullu ilaasortap Jørn Astrup Hansenip aningaaserivik sakkortuumik saassuppaa. Taamatut allappoq business.dk.
Landskarsi imaajarpaa
Taamaasilluni Eik Bank, naalagaaffimmit annaanneqarsimasoq, pasillerpaa paasissutissiissutigineqanngitsunik tunngaveqarluni akileraarutitigut 90 millioner koruuninik ilanngaateqarsimasoq, tamatumuunakkullu landskarsi aningaasanik taama amerlatigisunik annaasaqartillugu. Tamatuma saniatigut pisortaasimasup aningaaserivik pasillerpaa pisimasumi paasissutissanik isertuussinerarlugu.
Akiliisinnaajunnaartoq
Jørn Astrup Hansen Eik Bankimi pisortanngorpoq aningaaseriviup 2010-mi akiliisinnaajunnaarnerata kingorna. Naalagaaffiup selskabiata Finansiel Stabilitetip aningaaserivik tiguvaa, ingerlanneqarneralu selskabimik nutaamik pilersinneqartumik nanginneqarpoq. Tamatuma saniatigut Finansiel Stabilitet aningaaserivimmut 2 milliarder koruuninik aningaasaliissuteqarpoq.
Aningaasaqarneratalu misissorneqarnerata takutippaa aningaaseriviup pigisaasa 500 millioner koruunit missaannik nalikillisinneqarnissaat pisariaqartoq.
Tunineqarpoq
2011-mi aningaaserivimmi piginneqatigiissutit 70 procentii TF Holdingimut tunineqarput, Jørn Astrup Hansenilu pisortatut tunuarpoq, siulersuisunulli ilaasortanngorluni Finansiel Stabilitetip aallartitaatut. 2015-imi aningaaserivimmi piginneqatigiissutit sinneri 30 procentit Eik-ip pisiarai.
Atsiorneqanngitsoq
Nalikilliliinermut atatillugu Eikip savalimmiuni akileraartarnermut oqartussaasut aperisimavai nalikilliliissutit 500 millioner koruunit qanoq akileraaruserneqassanersut, paasitinneqarsimavorlu aningaaseriviup akileraarutitigut 90 millioner koruunit ilanngaatigisinnaagai.
– 2010-11-mi ukiukkut Finansiel Stabilitetimit aningaaserivimmi pisortanngortinneqarpunga, aningaaseriviullu allanngortiterneqarneranut peqataasimallunga. Isumaqarsimavunga ilisimallugu aningaaserivimmit akiliisinnaajunnaarsimasumit annaasat kimit, qanorlu isilluni suliarineqarsimanersut. Aningaaseriviup 2015-imut naatsorsuutaani aaqqissuusseqqinnerup ingerlarnga ilisarisinnaanngilara. Savalimmiut landskarsiata 90 millioner koruuninik imaajarneqarnissaanut peqataasinnaanngilanga. Isumaqarpunga sumilluunniit tunngavissaqarani taamaasiortoqartoq, Jørn Astrup Hansen business.dk-mut oqarpoq.
Unnerluussutit eqqunnginnerarpai
Eikip pisortaa Súni Schwartz Jacobsen ullumi atuartartut allagaatigut akissuteqarpoq. Taanna oqarpoq savalimmiuni akileraartarnermut oqartussaaffiup, TAKS-ip, akuersineratut Eikip akileraarutitigut ilanngaateqarnissaq atorsimanngikkaa. Ilanngaallu aamma 2015-imi atorneqarsimanngitsoq.
Pisortap ilanngullugu oqaatigaa suliassaq TAKS-imut tunniunneqarsimasoq, Eikip 2013-imi oqartussaasut apeqqummut isummerfigeqqusimavai, 2012-imut nammineerluni nalunaarut tunniunneqartussanngormat.
Ukiut marluk qaangiuttut TAKS inerniliivoq Eik akileraaruteqaataasussanut iluaqutissiissutitut (goodwill) taaneqartumik 500 millioner koruuninik nalikilliliisinnaasoq.
– TAKS 2015-imi juunip 30-anni Eikimut akissuteqarnermini naliliivoq aningaaserivik iluaqutissiissutitut 500 millioner koruuninik nalikilliliisinnaasoq, taakkualu tassaasut Eikip nutaap Eikitoqqap ingerlataanik tigusineraneersut. Nalikilliliissutit aningaasanngorlugit 90 millioner koruunit missaannik naleqarput, Súni Schwartz Jacobsen oqarpoq.
Naammattumik tunngavissaqanngitsoq
Akerlianik Jørn Astrup Hansen isumaqarpoq TAKS pisimasumi paasissutissanik pisariaqartunik naammattunillu pissarsisimagunanngivissoq.
– Kinaluunniit imminut oqarfigisinnaassaaq aningaasarsiat akileraaruteqaataasussat annaasanik, allap pilersissimasaanik, annikillisinneqarsinnaanngitsut, Jørn Astrup Hansen oqarpoq.
Aningaaserivinnut ikiorsiissutit
Taanna kingorna Kringvarp Føroya-mut (savalimmiuni radio- aamma tv-qarfimmut) itisiliillluni oqarpoq, Eikip paasissutissiissutigisimanngikkaa aningaaserivinnut ikiorsiissut 1 atorlugu aningaaseriviup 500 millioner koruunit pineqartut ilanngaatigereersimagai.
Eik Bankip siulersuisuini siulittaasup Torben Nielsenip business.dk-mut oqarpoq aningaaseriviup paasissutissat TAKS-imut isertuussimanngikkai.
Súni Schwartz Jacobsen oqarpoq TAKS-ip inernileereernerata kingorna Eik Bank isumaqarsimasoq suliassaq naammassineqartoq.
– Maanna pisimasoq nutaamik saqqummiunneqarmat siulersuisut aalajangerput TAKS attaveqarfigeqqinniarlugu. Pisariaqassappat nutaamik suliarineqarnissaata utaqqinissaanut piffissaqarpugut. Pisimasup qulaajarneqarnissaa soqutigisaraarput, Súni Schwartz Jacobsen oqarpoq.