Eqalussuarniarneq aallartilerpoq
Greenland Company septemabrip 1.-aniit Tasiilami illoqarfinilu allani marlunni eqalussuarnik pisortorneq aallartissavaa.
Tasiilami eqalussuarniarneq piviusunngungajalerpoq. Misileraalluni eqalussuarniarneq qaangiuteqqammersoq naatsorsuutigisamit ajunnginnerujussuarmik ingerlavoq, tulaassuinissarlu assorsuaq soqutigineqarpoq, sermersooq.gl allappoq.
Kommuneqarfik Sermersooq aamma KNAPK suleqatigiillutik pikkorissartitseqqammerput tamannalu Tasiilami tulaassuilernissap aallatinneqarnissaanut ingerlariarneq siulliuvoq. Kommuneqarfiup ammerivia pikkorissartitsinermi suleqataavoq. Tullianut ingerlariaqqinnissamut pisariaqartinneqartut tassaalerput namminersortut suliffiutillit aningaasaleeqataasussat:
- Tasiilami tulaassuilernissaq piviusunngortinneqassappat taava pisariaqarpoq quersuit uninngatitsivissat aamma qerititsivissat suliffiutilinnik namminersortunik pilersinneqarpata. Suliffiutilinnik namminersortunik suliniuteqartoqarneratigut taava tuniniaavissat aamma oqartussaasut tuniniaanissamut aammattaaq pisisartunik inatsisitigullu piumasaqaataasunik qulakkeerisuusinnaapput, Inuussutissarsiornermut Ataatsimiititaliap siulittaasua Esmar Bergstrøm oqarpoq.
Eqalussuarniarnermi periarfissat assut neriunartoqarput, Kalaallit Nunaanni eqarlussuaq atorfisaqanngitsutut isigineqartoq Kangiani Asiami aningaasanik naleqarpoq. Taamaattumik Kommuneqarfik Sermersumit ingerlatsivik Greenland Company, atsisanik ilusilersuisartumik Nauja Lynge Lyngesenimit aqunneqarpoq, suleqatiginiarlugu isumaqatigiissuteqarfigineqarpoq.
- Greenland Companymeersut ungasinngitsukkut Kinamut angalareerlutik tikipput, taavanilu eqalussuit pisataannik assigiinngitsunik pisisarumasunik ajunngitsumik tusarlerneqarsimallutik. Suliffeqarfiup naatsorsuutigaa eqalussuarniarneq septembarip aallaqqaataa aallarnerfigalugu aallartissinnaasoq. Aallaqqaataani Kalaallit Nunaanni sumiiffinni assigiinngitsuni pingasuni tunitsiveqassaaq naatsorsuutigineqarporlu qaammammut eqalussuit tusintit tulaanneqartarnissaat, Inuussutissarsiutini Inerisaavimmi pisortaq Marie Fleischer oqarpoq.
Aallaqqaataaniilli eqalussuarniarnermi aallavigineqarpoq piujuaannartitsinissaq tunngavigalugu eqalussuarniartoqarnissaa pilertortumik iluanaaruteqarnissaq pingaartinnerunagu. Taamaattumik eqalussuup tamakkerlugu atorneqarnissaa qitiutinneqarpoq kiisalu eqalussuarniartuarnissaq ineriartortinniarneqarluni.