Eqqagassalerinermut aningaasaliinerusoqassaaq
– Kisianni kikkut tamarmik eqqakkanik ajornartorsiutinik aaqqeeqataassapput. Oqartussat, inuussutissarsiortut innuttaasullu tamatumani suleqatigiinnissaat pingaaruteqarpoq, ilaatigut avatangiisinut naalakkersuisoq, Kalistat Lund (IA), oqarpoq.
ESANI – nuna tamakkerlugu eqqagassalerinermut ingerlatseqatigiiffik – aasaq manna nuna tamakkerlugu eqqagassanik katersilluni aallartissimavoq. Eqqakkat ukioq manna Danmarkiliaanneqassapput, kisianni ukiut marluk qaangiuppata eqqakkat katersorneqarsimasut nunatsinni ikuallaavissuarni nutaani marlunni, Nuummi Sisimiunilu sananeqalersuni, ikuallanneqartalissapput. Ikuallaavinnit nutaanit kissaq pilersinneqartoq ilaatigut illunik kiassaanermut iluaqutigineqassaaq.
Aviisi Sermitsiaq taama allappoq.
- Sisimiuni Nuummilu ikuallaavissuassat sananeqaleruttorput, kissarsuutissallu pisiarineqarsimallutik, ESANI-millu naatsorsuutigineqarpoq, ikuallaaviit nutaat taakku 2024-mi sananeqareersimassasut atulissasullu. Taamanikkornissaanut eqqakkat sinnerussat ilaannik, ullumikkut ikuallaavinni ikuallassinnaanngisatsinnik, Danmarkiliaassisariaqarpugut, ilaatigut avatangiisinut naalakkersuisoq, Kalistat Lund, nunaqarfiit sapaatip-akunnerani kingullermi ataatsimeersuarnerisa, ilaatigut eqqakkanik isumaginnittarnermik apeqqutip eqqartorneqarfigisaata, kingorna oqaluttuarpoq.
- Taamaattumik umiarsuarmik North Vikingimik, Esani Shippingip pigilersimasaanik, ukioq manna pingasoriarluta angalanissarput pilersaarusiorparput, ataatsimeersuarnermi paasissutissiivoq ilassuteqarlunilu:
- Taamaattumik kommuninik peqateqarluta eqqagassanik isumaginninnermik pitsaanerusumik pilersitsinissarput, eqqakkanillu isumalluutitut atorluaanerunissarput, pingaaruteqarpoq. Kissassuseq ikuallaavimmeersoq ilaatigut illunik kiassaarnermut iluaqutigissavarput.
ESANI-p umiarsuaanik eqqagassanik angallassissutimik angalanissamut katillugit 1.966.000 koruunit immikkoortinneqarsimapput, taakkunanngalu Miljøfonden 1,4 millioner koruuninik ESANI-lu 466.000 koruuninik aningaasaliissuteqarsimallutik, Kalistat Lund nunaqarfiit ataatsimeersuarneranni paasissutissiivoq.
Aviisimi Sermitsiami atuarnerusinnaavutit. Aviisi uani pissarsiariuk: