Eqqartuussissuserisut peqatigiiffiat: Aalisarnermut inatsisissatut siunnersuut ernumanartoq
Inatsisit tunngavigalugit isumannaatsuunissaq eqqarsaatigalugu Naalakkersuisut aalisarnermut inatsisissatut siunnersuutaat pisassiissutit agguataarneqarnerannut tunngatillugu ernumanartorujussuuvoq. Tamannalu inuiaqatigiinnut annertuumik kingunerlussaaq, Kalaallit Nunaanni Eqqartuussissuserisut Peqatigiiffiat oqarpoq.
Aalisarnermut inatsisissamut siunnersuutip immikkoortui pingasut Kalaallit Eqqartuussissuserisuisa tusarniaanermut akissumminni isornartorsiorpaat.
Eqqartuussissuserisut peqatigiiffiat isumaqarpoq pisassiissutit nutaamik killilerneqarnerat, maannakkut aalisartut pisassiissutinik pinngitsaalillugit tunniussinissaannut „pisinnaatitaaffinnik pigilerneqarsimasunik unioqqutitsinerusoq, pigisaminnik arsaarinnissuteqarnertut isikkoqartoq, tunngaviusumik inatsisillu immikkoortua 73-imut akerliusinnaalluni“.
- Tamanna inuiaqatigiit aningaasaqarnerannik annertuumik kingunerlutsitsisinnaavoq, taamatullu aaqqissuussineq Namminersorlutik Oqartussanit pigisaajunnaarsitsinermut taarsiissutissanik annertuunik (tamakkiisumik taarsiissutissanik) kinguneqarsinnaammat, taamaalillunilu pisortat aningaasaqarnerannik artukkiisoqarsinnaammat, Kalaallit Nunaanni Eqqartuussissuserisut allapput nangillutilu:
- Ingerlatsivissamik aaqqissuussineq siunnersuutigineqartoq ajornartorsiummik aaqqiissutissarsinavianngilaq.
Naligiissitaanermut najoqqutassiat
Aammattaaq kattuffik allappoq “ingerlatsinermi inatsisit naapertorlugit naligiissitaanermut najoqqutassianut akerliusumik Royal Greenland A/S-ip pisassai qaffasinnerusumik killilerneqarsimapput, Royal Greenland A/S namminersortutut inatsisitigut aktieselskabitut ingerlanneqaraluarluni”.
- Royal Greenland aamma niuernikkut ingerlanneqarpoq, pisortanit akuersissummik assigisaanilluunniit ingerlatsineq tunngaviginagu (Tusass A/S aamma Royal Arctic Line A/S assiginagit).Taamaasilluni Royal Greenland A/S eqqarsaatigalugu immikkut malittarisassaliortoqarpoq, tamannalu aalisartunut allanut sanilliullugu pisassiissutit equngasumik agguataarneqarnerannut kinguneqassaaq, Kalaallit Nunaanni Eqqartuussissuserisut naqissusiipput.
Ersarlussuseq
Pisassiissutit piffissaligaasumik atuutsinneqalernerat aamma atorunnaarsitsinissamut periarfissaqalerneq isornartorsiorneqarpoq.
- Oqaatigineqartut naapertorlugit atorunnaarsitsinissamut periuseq pisassiissutit agguataarnissaannut periutsit ilaattut isumassarsiarineqarpoq. Tamatumunnga atatillugu erseqqissumik oqaatigineqanngilaq kikkut aamma sunik piumasaqaateqarluni atorunnaarsitsisinnaanersut, ilaatigut kimut agguaassisoqassanersoq (taakkununnga ilaalluni neqerooruteqartitsinikkut assigisaanilluunniit pisiarineqarsinnaanersoq), eqqartuussissuserisut peqatigiiffiat ernumalluni allappoq, oqaatigaalu „paasiuminaatsumik ingerlatsisoqarsinnaanera aarlerinartoq“.
Aammattaaq erseqqissarneqarpoq tamanna „namminissarsiorluni taamaatitsinermik tunniussinermillu, taamaalillunilu erseqqissunik sinaakkutissaqannginnermik“, „ingerlatsinermi inatsisitigut naligiissitaanermut najoqqutassianik unioqqutitsinerusinnaasunik“, kinguneqarsinnaasoq.
Naliliisinnaassuseqartitsilerneq
Aamma Kalaallit Eqqartuussissuserisui ernumapput inatsisissatut siunnersuutip Naalakkersuisut “naliliisinnaassuseqartilermagit pissutsillu arlallit pillugit maleruagassat sukumiinerusut aalajangersarnissaannut” pisinnaatilersissimammagit, ukununnga tunngatillugu:
- Pisassiissutinik agguaanermut tunngaviusut
- Pisassiissutit agguataarnerat
- Pisassiissutit agguataarnerat ukiumullu pisassiissutit
- Pisassiissutit pinngitsaaliissummik tunniunneqartarnerat
Eqqartuussissuserisut peqatigiiffiat tusarniaanermut akissummini kaammattuutigaa ”inatsisissatut siunnersuut isumaliutigeqqinneqassasoq annertuumillu naleqqussarneqassasoq” aamma Naalakkersuisunut kaammattuutigaat naalakkersuisoqarfiup ”inatsisissatut siunnersuutip inuiaqatigiinnut aningaasaqarnikkut kingunerinut tunngatillugu naatsorsueriaatsit ersarissumik tunngavillit” pilersissagaat.