Eqqissiviittoqareersorlu pisortaq soraarsinneqarpoq

Aalborgimi Kalaallit Illuutaanni pisortaq Anna Lynge sapaatip-akunnerani kingullermi sisamanngornermi ingerlaannaq atuutilersumik soraarsinneqarpoq, ukiorpassuarnilu pisortaaffigisani qimassagaa qinnuigineqarpoq. 

Siullermik siulersuisuni siulittaasutut kingornalu 2023-mi januaarip aallaqqaataani pisortatut.

- Soraarsitsineq pivoq piffissami sivisuumi sulisut akornanni toqqissisimannginneq pissutigalugu eqqissiviilliortoqareersoq, pisortaagallartoq Jørgen Hein oqaluttuarpoq, taannalu pisortaanertut ivertinneqarnissami tungaanut Aalborgimi Kalaallit Illuutaanni siulersuisuni siulittaasuuvoq.

- Illutsinni avatangiisit pillugit Sulinermik Nakkutilliisoqarfimmit peqquneqarpugut – siulersuisunilu ajornartorsiutit tamakku maannamut pisortaasimasoq aqutsisuutillugu aaqqinneqarsinnaanngitsut naliliisimavugut. Tamanna pivoq sapaatip-akunnerani kingullermi pingasunngornermi siulersuisut ataatsimiinneranni. Naammagittaalliuut oktobarip 23-ani tunniunneqarpoq, siulersuisunili ilaasortat pingasut Kalaallit Nunaanneersuupput – taamaattumik ullualuit siulersuisunik katersinissamut atorpavut.

Piffissami sivisuumi eqqissiviilliorneq

Soraarsitsinnginnerminni pisortap aqutsinera sulisut ilaasa piffissami sivisuumi toqqissisimananngitsutut isigaat.

Tamatuma kingunerisaanik Suliffeqarfinnut Nakkutilliisoqarfik nalunaaruteqaqqaarani aggustip 30-ani kingornalu septembarip 27-ani nakkutilliiartorpoq. Tusarniaanerup kingorna Suliffeqarfinnut Nakkutilliisoqarfik ”suliassat pilersaarusiorneqarlutik, aaqqissuunneqarlutik suliarineqartarnissaat, taamaalilluni Kalaallit Illuutaanni sulinermi sulisut isumannaatsuunerat peqqissusaallu sivikitsumik sivisuumilluunniit ajortumik sunniuteqarnaveersaartinniarlugit” Aalborgimi Kalaallit Illuutaata qulakkeertariaqaraa peqqussuteqarpoq.

2025-mi marsip aallaqqaataanut piffissaliisoqarpoq.

Suliffeqarfinnut Nakkutilliisoqarfimmit nalunaarusiami „sulisut ilaat pisortamit nikassaanermik, ilaatigut sakkortuumik oqalunnermik assigiinngisitsinermillu, eqqugaasartut“ ilaatigut allassimasoqarpoq. Sulisut arlallit soorlu nikassaasumik ussersorfigineqartarnermik, oqaatsikkut naveerneqartarnermik mamarliisarnermillu ulluinnarni misigisaminnik oqaluttuarput.

Toqqaannartumik pineqartut sulisullu allat tulliullutik saassunneqarnissaminnut annilaangasarsimammata kanngunarsaanermik iliuutsit sullivimmi avatangiisinik toqqissisimananngitsunik pilersitsimapput. Nillianerit, oqaasipilunneq, suliamik nikaginninnerit tamallu tusaasinnaasaannik naveersinnerit ukiup ataatsip sinnera ingerlasimapput, tamannalu suliffimmi toqqissisimajunnaartitsivoq.

Sulisut arlallit suliartornerminni naarlulertarlutillu qimaarusuttaramik suliartorumajunnaartarlutik nalunaarput. „Aqutsisumiit nuannarineqartulluunniit“ allat qanoq pineqartarnerat nuanniitsutut misigisarpaat. Tamatuma saniatigut sullivimmi avatangiisit pissutigalugit sinnarluttarput."

Suliarujussuussasoq

- Suliaq tamanna killitsissutigeqaara, tamannalu alianartorujussuuvoq. Sulisut suliartornissaminnut kajumilersitseqqinnissaat anguniarlugu suliarujussuaq aallartittussanngorpoq, Jørgen Hein oqarpoq.

- Sapaatip-akunnerata siuliani ataatsimeersuartitsivugut, tassanilu pilersaarutikka oqaluttuaraakka. Innuttaasut illumik atuisut sulinermik kajumilersitseqqinniarlugit sulinermik isumaginninnermi tarnip pissusianik ilisimasallit marluk ikiortiseraagut.

- Sulinermi tarnip pissusianik ilisimasallit sapaatip-akunnerata tulliani ataatsimeeqatigissavagut – taakkulu januaarip 8-aani, 9-ani 10-anilu sulisunik ataasiakkaanik oqaloqateqarniarlutik takkuteqqissapput.

- Aamma pisortamik piaarnerpaamik atorfinitsitsinissarput sulissutigissavarput – taamaammat ukiumi nutaami pisortamik nutaamik piaarnerpaamik atorfinitsitsisinnaaniassagatta atorfik inuttassarsiuunneqalereerpoq.

Siulittaasoq nutaaq

Aalborgimi Kalaallit Illuutaanni pisortanngorallartitsinermut atatillugu Jørgen Hein siulersuisuni siulittaasutut tunuarpoq. Kaj Heilmann siulersuisuni siulittaasunngorpoq, taannalu siulersuisuni qulingiluaasuni taakkungannga Naalakkersuisut toqqagaanni pingasuni ilaasortaavoq. Siulersuisuni ilaasortat allat Aalborgimi illoqarfimmi siulersuisut kiisalu Erhverv Norddanmarkimit, Jyllandip avannaani kalaallit peqatigiiffiannit kiisalu sulisut sinniisaannit toqqarneqarput.

Anna Lyngep soraarsitaanini oqaaseqarfigiumanngilaa.

- Suliaq inummut tunngasutut tamanullu tunngasuunngitsutut isigigakku itinerusumik oqaaseqarsinnaanngilanga. Aliasuppunga sunnertisimasutullu misigisimallunga, Anna Lynge Sermitsiamut oqarpoq.

Aalborgimi Kalaallit Illuutaanni aqqanillit pisortaagallartorlu ataaseq maannakkut sulisorineqarput.