Erhvervsministeeriaqarfik: Imaq Pilot naammattunik isumalluutissaqanngilaq
Naalagaaffiup ilisimasortatut suliffeqarfiutaa DanPilot nunami maani suliaminik ingerlatsiinnassaaq, nunatsinni najugallit imaatigut isumannaallisaanermik namminneerlutik isumaginnissinnaalernissaasa tungaanut. DanPilotip nunami maani immikkoortortaqarfittaarnera pillugu isornartorsiuinermut erhvervsministeeriaqarfimmit oqaatigineqarpoq.
DanPilotip coronap atuunnerani Kalaallit Nunaanni suliaminik tamanik unitsitseriarluni februaarip qaammataani suliaqaqqilernissamik aalajangersimanera inuussutissarsiortunut politikkerinullu aalassatsitsisimavoq.
Inuussutissarsiornermut Niuernermullu Naalakkersuisup Pele Brobergip (N) Folketingimilu IA sinnerlugu ilaasortap Aaja Chemnitz Larsenip nunami maani ilisimasortatut suliassat pillugit Kalaallit Nunaanni suliffeqarfimmut mikinerusumut naalagaaffiup unammillernera apeqqusersimavaat.
Erhvervsministeeriaqarfiup Sermitsiaq.AG-mut allakkatigut akissuteqarluni oqaatigisimavaa, matumani isumalluutissat pineqartut.
- Søfartsstyrelsenimit nalilerneqarsimavoq, umiarsuartigut takornariartitsisarnerup nalaani Kalaallit Nunaanni ilisimasortaqarnissamik pisariaqartitsineq matussuserniarlugu ilisimasortat 20-nik amerlanerusut pisariaqartinneqassasut. Najukkami ilisimasortaqartitsisartoq Imaq Pilot ilisimasortassanik naammattunik sulisussaqanngilaq, taamalu DanPilot Greenlandip ilisimasortaqartitsinissaa suli pisariaqartinneqarluni.
Aperineqarsimanngitsut
Kalaallilli Nunaanni ingerlatseqatigiiffiup Imaq Pilotip pisortaata taamatut naliliisoqarsimanera akuersaanngilaa.
- Periuserineqartartoq malikkaanni, tassa ilisimasortat marluk Islandimi umiarsuarmut ikigunik, Kalaallillu Nunaata imartaata qimannissaata tungaanut umiarsuamiitinneqarpata, aap taava ilisimasortanik 20-nik atuisoqassaaq, tamannali umiarsuaatileqatigiiffimmit uatsinniilluunniit soqutigineqartuunngilaq, Jakob Nordstrøm Sermitsiaq.AG-mut oqarpoq.
Taassuma erseqqissaassutigaa, inatsimmi piumasaqaataasunut naapertuutinngilluinnartumik umiarsuaatileqatigiiffiit akisuupilussuarmik aaqqiissuteqarsimasut.
- Danskit naalagaaffiannit qassinik isumalluutissaqarnersugut aamma suliassanik naammassinnissinnaanersugut aperineqarsimasuugutta, ilisimatitsissutigisimassagaluarpara maannakkutut arfineq-pingasuniik qulinut ilisimasortaqarnitsinni suliassat isumagisinnaalluarlutigit.
Imaq Pilot suliassaqarfiup aallartinnerani arfineq-pingasunik sulisoqarpoq, taakkunannga arfinillit kalaaliupput, marluk danskiullutik ataaserlu savalimmiormiuulluni, pisortaq ilisimatitsivoq. Amerlanerusunik sulisoqalernissaq sulissutigineqarpoq.
Killeqarfiup 3 sømiliusup iluani ilisimasortaqarnissaq inatsisitigut piumasaqaataasoq
Jakob Nordstrømip nassuiaatigaa, ilisimasortaqarnissamik inatsisitigut piumasaqaateqarfiusumi, tassa killeqarfiup 3 sømilip iluani ilisimasortaqartitsisarlutik.
DanPilot 2016-imili Kalaallit Nunaanni suliaqartalersimavoq, taamanikkut Kalaallit Nunaata imartaani umiarsuit 250-inik amerlanerusunik ilaasullit ilisimasortaqartalernissaat atuutsinneqalermat.
Erhvervsministeeriaqarfip tassunga atatillugu DanPilot Kalaallit Nunaanni ilisimasortaqartitsisalersinnaanersoq pillugu qinnuigisimavaa, Kalaallit Nunaanni najugalinnik naammattunik ilisimasortassaqartitsisoqanngimmat. Ministeeriaqarfimmit erseqqissaassutigineqarpoq, DanPilot Kalaallit Nunaanni suliaminik unitsitsinngisaannarsimasoq.
- Ingerlatseqatigiiffiup nutaap, DanPilot Greenlandip pilersinneqarneranut atatillugu ingerlatseqatigiiffiup aaqqissuussaanera allanngortiinnarneqarsimavoq, ministeeriaqarfimmit oqaatigineqarpoq.
Siorna aggustip qaammataani nalunaarutigineqaraluarpoq, DanPilot toqqaannartumik aqqutigalugu DanPiloti Kalaallit Nunaanni ilisimasortaqartitsinissamik neqerooruteqartalissasoq, taamalu ingerlatseqatigiiffik Greenland Pilort Service ApS aqqutigalugu neqerooruteqartarunnaartoqassasoq. Ukioq-mannali februaarip qaammataani DanPilot immikkoortortaqarfimmik nutaamik, DanPilot Greenland ApS-imik pilersitsisoqarpoq.
Ilisimasortassat nutaat ilinniartinneqarnerannut ikiuutissasoq
Kalaallit Nunaanni ingerlatseqatigiiffik Imaq Pilot siorna pilersinneqarpoq. Pisortap Jakob Nordstrømip siornatigut DanPilotimut ilaasimasup, politikkerit arlallit assigalugit tupigusuutigisimavaa, danskit naalagaaffiata nunami maani immikkoortortaqarfimmik pilersitsinissaq aalajangersimammagu.
DanPilot Greenlandimit qulakkeerneqassaaq, imaatigut isumannaallisaanerup isumagineqarnissaanut naammattunik isumalluutissaqarnissaq. Tamatumunnga peqatigitillugu ilisimasortaqarfiit allat ilisimasortanngornianik ilinniartitsisassapput, ilisimasortatut eqqortumik misilittagaqartoqalernissaa qulakkeerniarlugu, ministeeriaqarfimmit ilisimatitsissutigineqarpoq.
- Erhvervsministeeriaqarfimmit siunertarineqarpoq, Kalaallit Nunaanni ilisimasortat pisariaqartinneqartunik piginnaasaqalerniariarpata DanPilotip Kalaallit Nunaanni suliaqarunnaarnissaa.