Nuup eqqaani mittarfissualiorneq aatsaat taama annertutigisoq naammassingajalersoq, eqqaani sanaartornersuaq milliardilikkaanik akeqartoq aallartinneqassaaq.
Utoqqarmiut Kangerluarsunnguanni erngup nukinganik nukissiorfiup allilerneqarnissaa tassani pineqarpoq, Namminersorlutillu Oqartussat suliffeqarfiutaata Nunagreen Construction A/S-ip suliariumannittussarsiuussineq qaammatialuit qaangiuppata aallartinneqassasoq ilisimatitsissutigaa.
Nuup eqqaani mittarfissualiorneq aatsaat taama annertutigisoq naammassingajalersoq, eqqaani sanaartornersuaq milliardilikkaanik akeqartoq aallartinneqassaaq.
Utoqqarmiut Kangerluarsunnguanni erngup nukinganik nukissiorfiup allilerneqarnissaa tassani pineqarpoq, Namminersorlutillu Oqartussat suliffeqarfiutaata Nunagreen Construction A/S-ip suliariumannittussarsiuussineq qaammatialuit qaangiuppata aallartinneqassasoq ilisimatitsissutigaa.
Erngup nukinganik nukissiorfiup allilerneqarnissaa 2023-mi upernaakkut suliariumannittussarsiuunneqartussatut pilersaarutaasimavoq, suliniutilli pitsanngorsarneqarnera pissutigalugu maanna suliariumannittussarsiuussineq nutaaq sulissutigineqarpoq. Nunagreenimi pisortaaneq Aviaaja Karlshøj Knudsen Sermitsiamut taama oqarpoq:
Qajannaannerullunilu siunissamut isumannaatsuussasoq
- Suliniummi siullermi maanna erngup nukinganik nukissiorfiusup allineqarnissaa pilersaarutaasimavoq. Aammattaaq erngup qaffasinnerulernissaanik qulakkeerinninniarluni tatsip qaffasinnerusumik inissisimasup erngup nukinganik nukissiorfimmut atassuserneqarnissaanut 16 kilometerisut takitigisumik sullorsualiornissaq.
- Suliniutip qajannaannersunissaa, siunissamut isumannaatsuunissaa allanillu taarserneqarsinnaanissaa aalajangerneqarsimavoq, maannalu nukissiorfiusimasoq allilerneqarnani sullorsuup eqqaani nutaamik nukissiorfiliortoqassaaq, taamaalilluni nukissiorfiit marluk pilersinneqarlutik, Aviaaja Karlshøj Knudsen nassuiaavoq.
Alliliinermut pilersaarut allanngortinneqarmat sanaartornerup teknikkikkut tunngavissaata misissoqqissaarneqarnissaa pisariaqarsimasoq oqarpoq:
- Tamanna pissutigalugu (2023-mi upernaakkut, aaqq.) suliariumannittussarsiuussinissaq pilersaarutaasutut ingerlanneqanngilaq, taarsiulluguli suliniut aaqqiissut nutaaq naapertorlugu iluarsaanneqassasoq siunnersuisut qinnuigineqarput.
Sullorsuaq suliniummik „annertusaangaatsiartoq“
Sullorsuaq takisooq alliliinermi suli qitiusoq Aviaaja Karlshøj Knudsenip ilanngullugu nassuiaatigaa:
- Sullorsuaq suli ilaavoq, taassumalu suliniut annertusingaatsialaarpaa. Sullorsuaq kilometerinik 16-inik takissuseqassaaq, tatsillu marluk atassuserniarlugit qaqqami 200-niit 300 meterinut qaartinneqassaaq.
- Erngup nukinganik nukissiorfiup ullumikkut atuuttup eqqaani qaqqap qaani qaarusuliortoqassaaq, tamatumalu kingorna 76,9 MW-inik sakkortussuseqartumik nukiliorfissaq ikkunneqassalluni.
Taamaalilluni suliniummi imeq atorneqartartussaq Utoqqarmiut Kangerluarsunnguannut kuutsinnginnerani marloriarluni atorneqartassaaq.
Nunagreen Construction A/S-ip decembarimi piukkunnartussarsiornissaq naatsorsuutigigaa Aviaaja Karlshøj Knudsen nangilluni oqarpoq. Tamanna suliariumannittussarsiuussinermut aallarniutaassaaq, tamakkiisumillu suliariumannittussarsiuussineq 2025-mi februaarip naanerani aallartinneqassaaq.
Atassutinut kabelit akitsortut
NunaGreen Construction A/S-ip Utoqqarmiut Kangerluarsunnguanni erngup nukinganik nukissiorfiup allilerneqarnissaata saniatigut aamma Aasiannut Qasigiannguanullu erngup nukinganik nukissiorfiliornissamik sanaartornissamut neqerooruteqarnissaq piareersarpaa. Aki tamakkiisoq 4,6 milliardit koruuniussasoq siornatigut nalilerneqarnikuuvoq.
Suliniutinut taakkununnga marlunnut aningaasartuutit siornatigut naatsorsukkanik tunngaveqarput, taamaammallu nalorninartorsiortoqarsinnaavoq, ingammik atortussat pisariaqartinneqartut akiisa allanngoriartorsinnaanerannut tunngatillugu, pisortaq oqarpoq:
- Qeqertarsuup Tunuani suliniummut siunnersuinissamut neqeroorummik piareersaanermik maanna aallartitsivugut, tassanilu Nukissiorfiit 2020-mi pilersaarusiaat aallaavigissavarput.
- Missingersuutit tamarmiusut qaffassinnaasut naatsorsuutigineqarpoq, pingaartumik aqqutit attaveqaatit, suliniummi pingaaruteqartut, akiisa qaffarujussuarsimanerat pissutigalugu. Aasiannut Qasigiannguanullu mingutsitsinngitsumik nukissiornissamik suliaq NunaGreenimit pingaartinneqarpoq, Aviaaja Karlshøj Knudsen oqarpoq
