ETM-ip aqutsisuisa Kuannersuit oqaluuseriniarlugu nunarput tikeraarpaat

Energy Transition Minerals Ltd.-mi (ETM) sulisut aqutsisuusut sapaatip-akunneranik sivisussusilimmik nunatsinnut tikeraarnertik naammasseqqammerpaat, tassani Kuannersuarmi aatsitassarsiornermik suliniummut tunngasunut attuumassuteqartut qitiusut ataatsimeeqatigaat.

Greenland Mineralsiusimasup aatsitassarsiornermik suliniutertik pillugu februaarimi 2021-mi Narsami innuttaasut tusarniaalluni ataatsimiinnermut qaaqqusimmata oqariartuuteqartoqarpoq.

Merete Lindstrøm / Sermitsiaq.AG

Merete Lindstrøm

Published 4 July 2023 - 09:52

Annonse

Energy Transition Minerals Ltd.-mit (siornatigut Greenland Minerals) aallartitat qanittukkut Kalaallit Nunaannut tikeraarnerminni susassaqartut arlallit ataatsimeeqatigaat, Aatsitassanut, Inatsisinik Atuutsitsinermut Naligiissitaanermullu naalakkersuisoq, Naaja Nathanielsen, aamma naalakkersuisoqarfimmi pisortaq Jørgen T. Hammeken-Holm ilanngullugit.

Uranimik il. il., misissueqqaarnermut, ujaasinermut piiaanermullu inerteqquteqarneq pillugu Inatsisartut inatsisaat nr. 20, 1. december 2021-mersooq

§ 1. Uranimik misissueqqaarneq, uranisiorluni misissuineq aamma piiaaneq akuerisaanngillat.
Imm. 2. Misissueqqaarneq, uranisiorluni misissuineq piiaanerluunniit uranimut sammitinneqarani allamut sammitinneqarpat, agguaqatigiissillugu uranimik akoqarnera 100 ppm inorlugu oqimaassuseqarpat, imm. 1-imi aalajangersagaq atuutissanngilaq.

Inatsisip nr. 20-p Greenland Minerals A/S Kuannersuarni piiaanissaut akuersissummik pissarsisinnaatinngikkaa, Naaja Nathanielsenip aammaarluni Naalakkersuisut isumaat oqaatigeqqikkaa, ingerlatseqatigiiffik tusagassiuutinut nalunaarummi ilisimatitsissutigaa.

Tamatuma saniatigut sapaatip akunnerini aggersuni ETM-ip suliarinninnermi periuseq allanngortinneqartumut qinnuteqaataanut akissummik takkuttoqassasoq nalunaarutigineqarpoq, tassani uranimik piiaaneq ilanngunneqanngilaq. ETM-ip taamatut pisoqarnera isumaqatiginninniartitsinermik suliassanngortitsinissamik siunertaqarnerminnut uppernarsaanissamut kingusinnerpaamik ukioq manna 19. juli tunniussaqarnernissamut atorniarpaa.

Itigartitsisoqarnissaa naatsorsuutigigaat

Aatsitassanik qaqutigoortunik saniatigullu uranimit sinneruttunik piiaanissamut qinnuteqaat siulleq assigalugu, qinnuteqaammi nutaami itigartitsisoqarnissaa naatsorsuutigineqartoq, Energy Transition Minerals ilisimatitsivoq.

Naalakkersuisumik naalakkersuisoqarfimmilu pisortamik oqaloqateqarnerup saniatigut ingerlatseqatigiiffimmit aallartitat aamma Naleqqamit, Demokraatinit, Siumumit kiisalu SIK-mi siulittaasumik aamma inuussutissarsiortut ilaannik oqaloqateqarput.

Qinnuteqarnermi suliap ingerlateqqinnissaanut Københavnimi isumaqatigiissitsiniartarfimmut suliassanngortitsilluni nalunaaruteqarnissaq alloriarnissami naleqqunnerpaasoq, ETM-imi aqutsisut isumaqarput.

Suliassanngortitsineq saqqummiunniaraat

Isumaqatiginninniartitsinermik suliami paatsooqatigiinnerit qulaajarneqarnissaasa pingaaruteqarnera ETM-ip oqaatigaa, taamaattumillu suliassanngortitsineq piareerpat saqqummiunneqarnissaa qulakkeerniarpaa. Suut tamarmik kikkunnilluunniit soqutigineqartut, suliffeqarfiup attappaa, tusagassiuutinut taama nalunaaruteqarput.

- Taamatut ingerlatsinitsinni suliassanngortitatsinnut tatiginninnitta allanngortinneqarsinnaannginnera ersarippoq, Daniel Mamadou, ETM-imi pisortaaneq oqarpoq.

- Narsami ineriartortitsinissamut periusissaasumi suliat ineriartortinnissaannut pisinnaatitaaffitsinnik suliassanngortitatta eqqartuussivimmi tunngavilersornissaanut qilanaarpugut.

inuussutissarsiutit nunatsinnit