EU-p arfanniarnerput akornusernialerunarpaa
Kalaallit arfattassinneqarnissaminnik kissaataat arfanniarneq pillugu ataatsimiititaliarsuarmi, IWC-mi, isumaqatigiissutiginiarneqalerpata, EU-mi ilaasortat ukioq manna aamma akornusiinialerunarput.
Europa pillugu ataatsimiititaliap ataatsimiinginnerani paasissutissat tunniunneqartut naapertorlugit, Danmarki akerliugaluarpalluunniit ilaasortat amerlanerussuteqartut siorna pisutut akornusiissagunartut, Piniarnermut aalisarnermullu naalakkersuisoqarfimmi pisortaq, Amalie Jessen KNR-ip radioaviisianut oqarpoq.
- IWC-mi siorna ataatsimiinnerup nalaani EU-mi ilaasortat isummaminnik ataatsimut saqqummiussinerannik pissuteqartumik Kalaallit Nunaata piumasaqaatini qipoqqartassinneqarnissamut iluatsinngotsoorai. 2009-mi aamma ukiunilu tuliuttuni aamma attatiinnarneqassappat taava soorunami kattuffissuarmi ajortoqavissimassaaq. Tamanna eqqarsarnartoqarpoq. Kalaallit Nunaata piumasaqaataanik ilumut naammassinnissinnaanersoq apeqqutaalissalluni, Amalie Jessen oqarpoq.
Taamatut Amalie Jessenip kattuffissuup naaperluittuilluartumik aalajangiisinnaaneranik apeqqusiinera pissuteqarpoq, kalaallit arfattassinneqarnissaminnik piumasarisaat, ilisimatuussutsikkut misissuinerit naapertorlugit akornutissaqartinneqartussaanngikkaluarnerat.
Arfanniarneq pillugu siorna ataatsimiinnerup kingorna Aalisarnermut piniarnermullu naalakkersuisup, Finn Karlsenip, nunanut allanut ministereqarfik qinnuigaa, Nunatta IWC-miit ilaasortaajunnaarsinnaanera misissoqqullugu, tamannalu suli suliarineqarpoq.