Facebook: Atuisut 87 millionit ullumi nalunaarfigineqassapput
Paasissutissat suut inuit attaveqaqatigiittarfiani takuneqarsinnaanersut, Facebookip atuisut 2,2 milliardit paasissutissiiffiginiarpai.
Politikkikkut naliliisartunut Cambridge Analyticamut, inuit attaveqatigiittarfiannik atuisut 87 millionit paasissutissaataat piumassuserinngisaannik saqqummiunneqarsimanersut, Facebookip ataasinngornermi paasissutissiiffiginiarpai.
Taakku atuisut 87 millionit amerlanerpaartaat – 70 millionit – USA-miittut ingerlatseqatigiiffik ilisimatitsivoq. Tamatuma saniatigut 1 millionit sinnerlugit amerlassuseqartut Indonesiamit, Filippinerinit aamma Tuluit Nunaanneersuupput.
Tamatuma saniatigut Facebookip atuisunut 2,2 milliardinut ‘’Beskyt dine oplysninger’’-mik qulequtserlugu paasissutsissanik nassiussiniarpoq. Tassani appit sorliit Facebookimik atuisut Facebookiannut atassuteqarnersut, aamma taakku appit paasissutissanik sunik takunnissinnaanersut takuneqarsinnaassaaq.
Nutaarsiassaqartitsivik AP taama allaaserisaqarpoq.
Tuluit ingerlatseqatigiiffiata naliliisarnermik suliaqartup Cambridge Analyticap amerikamiut 87 millionit paasissutissaataannik takunnissinnaanermut qanoq iluatsitsisimanerat paasineqarmat, sapaatip-akunnerini kingullerni Facebook annertuumik isornartorsiorneqarpoq.
Cambridge Analyticap paasissutissarpassuit taakku amerikami 2016-imi præsidentimik qinersinermut atatillugu qinersisartunik sunniiniarnerminut atorsimavai.
Ingerlatseqatigiiffiup atuisut nammineq paasissutissaatiminnik aqutsinerulersinnaalersinniarlugit Facebook kingorna nalunaaruteqarnikuuvoq.
Atuisut inuit attaveqatigiittarfiinut nammineerlutik avitseqatigissutigisimasaminnik aallersinnaanerat aamma piiaasinnaanerat ajornannginnerulersinneqassaaq, taamaalillutik allatut atorneqarsinnaassannginnamik.