Facebook ukiuni 20-nngortorsiunngitsiarluni 96 milliardinik sinneqartooruteqarpoq
Metap 2023 ineriartorluni naavaa, Facebookillu ukiut 20-nngortorsiornera 96 milliarder koruuninik sinneqartoorfiusumik nalliussineqassaaq.
Facebookimik Instagramimillu piginnittoq, Meta, sisamanngornermi tupaallatsitsilluni qaammatinut pingasunut naatsorsuutinik Wall Streetimi ilimagisanit pitsaanerusunik saqqummiussivoq.
Siorna qaammatini pingasuni kingullerni ingerlatseqatigiiffik 40,1 milliardit dollarinik kaaviiaartitaqarnerminit 14 milliardit dollarinik sinneqartooruteqarpoq.
Tamanna 96 milliardit koruuninik aamma 275 milliardit koruuninik naleqarpoq.
- Qanittukkut qaammatini pingasuni angusarissaarpugut attaveqaativut niuernerpullu ineriartortuarmata, Mark Zuckerberg, Metap pisortaanera oqarpoq.
Metap aktiaasa nalingi 14 procentimik qaffariarput.
Sapaatiummat Facebookip ukiut 20-nngortorsiornera sioqqutilaarlugu qaammatinut pingasunut naatsorsuutit saqqummiunneqarput.
Facebookip pisortaanera Mark Zuckerberg USA-mi kongressimi ilisimannittutut nalunaajaareersorlu Metap naatsorsuusiai saqqummiunneqarput.
Discordimi, Snapchatimi, TikTokimi X-imilu pisortaanerit peqatigalugit pingasunngornermi teknologiimik suliffeqarfiit taakkualu internetikkut meeqqanik atornerluinerit pillugit atuuffeqarnerminnut tusarniaanermi nalunaajaanissamut qaaqquneqarpoq.
Oqallinnermi pikkunartorujussuarmi Zuckerberg nikuittariaqarsimavoq pinerluffigitittullu ilaqutaannut, tusarniaanermut aamma peqataasunut, toqqaannartumik utoqqatserluni.
- Misigisimasasi pillugit utoqqatserpugut, ilaquttassi misigisimasaat kimilluunniit misigineqartussaanngikkaluarput, oqarpoq.
Aamma oqarpoq internetip pilersinneqarneraniilli meeqqat illersornissaat unammillernartuusoq.
Facebook siornatigornit inuusuttunit atorneqarnissaatut nuannarineqartigiunnaarunaraluarluni, naammagittaalliornerit inatsisinillu unioqqutitsinerit takussaasaraluartut ingerlatseqatigiiffik qajannaatsuusoq paasinarsivoq.
Niuertarneq taanna, inuit paasissutissaannik ussassaarutinut tuniniaanermik tunngaveqarluartoq, arlaleriarluni Metamut akiligassiissutigineqarsimavoq.
Ateq Meta 2021-mi pilerpoq, Zuckerbergip isumaqarami metaversemik taaneqartartoq, taaguummi pineqartoq, internetikkut attaveqaatit tungaatigut pingaarnerpaajulerumaartoq.
Silarsuartut takussaanngitsutut silarsuarmit piviusumit allaanerulluinnartutut, tassanilu inuit naapissinnaallutillu attaveqatigiissinnaasutut metavers nassuiarneqarsinnaavoq.
/ritzau/AFP