Fast track iluatsilluarpoq – aaqqissuussinerli suli pitsaanerulersinnaalluni
Sulisut atorfinitsinneqarlaat avataaneersut suliffeqarfinni ingerlaannaq sulilersinnaanissaat Sulisitsisunit kissaatigineqarpoq. Ullumikkut nunani allaneersut oqartussat akuersissutaannik qaammatini aappaa affarmit marlunnut utaqqisariaqartarput.
Kalaallit Nunaanni suliffeqarfiit maanna sulisussanik nunarsuarmit tamarmeersunik sukkasuumik eqaatsumillu sulisussarsisinnaalerput. Danmarkimi Styrelsen for International Rekruttering og Integrationimi, SIRI, fast trackimik aaqqissuussinermik taasaq malillugu akuersissutiginninneq nalinginnaasumik qaammatip ataatsip missaanik sivisussuseqartarpoq. Tamanna suliffeqarfinnik piginnittut namminersortut nuannaarutigaat isumallualissutigalugulu.
Tamakkua akornanniippoq Frank Bagger, Ilulissani Hotel Ilulissanik piginneqataasoq. Aviisi Sermitsiaq taama allappoq.
- Fast trackimik aaqqissuussineq naammagisimaartorujussuuarput, siusinnerusumut sanilliullugu sulisussanik avataaneersunik sukkanerusumik pissarsisinnaagatta. Taamaanngippat pissutsit iluatsissinnaanavianngikkaluarput, taanna oqarpoq.
Hotel Ilulissat sulisunit 35-nit sulisunik Filippinerineersunik arfineq-pingasunik sulilersitsisimavoq. Akunnittarfik ukiut marlussuit matuma siorna aallartimmat, nunaqavissuinnaat sulisorineqarput.
Tamannali ajornartorsiuterpassuarnik nassataqarpoq, sulisut pikkorinnersaat periarfissamik takkuttoqaraangat sulisitsisunut allanut nuuttarmata, akunnittarfiutilik nassuiaavoq. Taamaattumik akunnittarfiup ingerlanneqarnera qulakkeerniarlugu naammattunik sulisussaqarniarluni avataaneersunik sulisussarsiortarneq pisariaqarpoq, Frank Bagger isumaqarpoq.
Hotel Qaqortoq Kalaallit Nunaanni fast trackimik aaqqissuussinermik aamma naammagisimaarinnilluarpoq. Akunnittarfik siusinnerusukkut sulisussanik avataaneersunik Qaqortumukartitsiniarluni qaammatit qulingiluat angullugit utaqqisinnaasarsimagaluartoq akunnittarfimmi pisortaq naapertorlugu ullumikkut ingerlalluartoqarpoq.
Allaaserisaq tamaat Sermitsiami sapaatip-akunnerani saqqummersumi atuaruk, uani:
