Finanstilsynet: Ajunaarutaasinnaasut mianersorfigisigit
Grønlandsbankip Finanstilsynimit nalinginnaasumik nakkutilliilluni misissuiffigineqarneq annerusumik nalunaarsuiffigineqarani. Aningaasanik ingerlatsinermik nakkutilliisut aatsitassarsiornermik suliniutit mianersorfigeqquaat
Aningaaseriviit allat millionilikkaanik nalilinnik naalakkiuteqarfigineqartut Grønlandsbankip Finanstilsynimit ukiumoortumik misissuiffigineqarnini annerusumik nalunaarsuiffigineqarani anigorpaa.
- Soorunami nuannaarutigisorujussuuarput aningaaserivimmik ingerlatseriaaserput patajaatsuusoq uppernarsigatsigu, aningaaserivimmi pisortaq Martin Kviesgaard oqarpoq.
Misissuivigineqarnermi paasinarpoq aningaaseriviup sullitaminut aningaasanik atorniartitsisarnera aningaaserivinnit minnerusunit allanit amerlanerumaartut. Finanstilsynip aamma ersersikkusuppaa nunatsinni illunik tuniniaaneq Danmarkimit suliassaqarfimmi tassannga allaanerusumik ingerlammat, aamma aningaaseriviup namminersorluni oqartussat pigisaannik sullitaasa ukioq kingulleq aningaasanik isaatitsilluarnerat. Grønlandsbanken kingullermk finanstilsynetimit 2007 misissuivigineqarpoq.
Ajunaarutaasinnaasoq ataaseq ilisimatitsissutigineqarpoq
Banki ajunaarutaasinnaasumik ataatsimik ilisimatitsissummik tunineqarpoq suliassaqarfinni assigiinngitsuni aningaasaleeqataavallaarnera pillugu aningaaseriviullu tamakku ikilisartariaqarai.
- Aningaasanik atorniartitsinerup pitsaassusaa tusarluarnaraarput, taassuma ersersimmagu Kalaallit Nunaanni sullitavut ajunngitsumik atugaqartut. Misissuiffigineqarnermit ajunaarutaasinnaasunik ilisimatitsissut maluginiarparput, taannali pillugu eqqaamassavarput akiliissinnaassuseqarluartunik kiffartuussaqaratta, Martin Kviesgaard oqarpoq, misissuisoqarnera ajunngitsumik ingerlasimasoq unnerlugu.
Grønlandsbankimi misissuisoqartillugu nalilersueriaatsimi angusassat tamaasa pitsaasumik anguaat, soorlu Finanstilsynip aamma nalileraa, aningaaseriviup nammineq matusisinnaanera 10,3 procentiusoq juunimi 2012-imi naatsorsorneqartoq naammaginarluartoq.
Nakkutilliisut: Aatsitassarsiornermik ingerlatani ajunaarutaasinnaasut mianersorfigisigit
Naak, Grønlandsbankip Finanstilsynimit nalinginnaasumik nakkutilliiffigineqarnini annerusumik nalunaarsuutitaqartumik anigoraluaraa, Sermitsiaq.AG-mit "Grønlandsbankip misissuiffigineqarneranit nassuiaat" atuaramiuk maluginiarneqarpoq ilanngussaq una:
- Finanstilsynet aningaaserivimmut nalunaarutigaa, taassuma mianersorfigissagai aatsitassarsiorfinnik angisuunik pilersitsinernut atatillugu ajunaarutaasinnaasut.
- Allatut oqaatigalugu isumaqarpoq aningaasat nalikillisinnaanerat aatsitassarsiorneq aallartilluassagaluarpat. Grønlandbanki inuiaqatigiinnut tarrarsortuupput taamaattumik ajunaarutaasinnaasut mianersorfigissavagut, Martin Kviesgaard Sermitsiaq.AG-mut nassuiaavoq.
Taassuma erseqqisaatigaa ajunaarutaasinnaasut Grønlandsbankip ukiumoortumik nalunaarusiaani kingullermi aamma Sermitsiami apersorneqarnerani atuarneqarsinnaasut.