Flytrafik forsætter stort set problemfrit

Islandimi innermik anitsisartup Grimsvötnip arsakuinut tunngasunik ilimasaarut kingullerpaaq Københavnip Timmisartoqarfiata tigusimasaa atuaraanni marlunngornermi angalasussat annakkuummissutigisussaassavaat. Taama Københavnip Timmisartoqarfiata tusagassiinermik qullersaa Søren Hedegaard Nielsen paasissutissiivoq.

Ilimasaarutit timmisartoqarfiup pissarsiarisimasai Naviair-imeersuupput ilisimasalinnillut allaneersuullutik, ilimasaarutaallumi marlunngorup annersaani isumallualersitsisinnaavoq.

- Unnugu nal. 20.00-ip tungaanut angallannermut Københavnip Mittarfeqarfianut sunniuteqarnavianngilaq, taama Søren Hedegaard Nielsen oqarpoq.

Taassuma paasissutissiinera malillugu Skotlandiliartussaagaluaq ataaseq unitsiinnarneqarsimavoq Nunatsinnullu aallartussaagaluaq kisimi unitsiinnarneqarsimalluni. Taakkuali saniatigut Atlantiku ikaarlugu ilaasussat sivisunerusumik timminissartik naatsersuutigisariaqassavaat.

Tuluit silasiorfiata UK Met Office-p tamanut ilimasaarusiaat naapertorlugu innermik anitsisartup arsakui ullup ingerlanerani Danmarkimut siaruaakkiartulissangatinneqarput.

Kingusinnerusukkulli timmisartuussinernut sunniuteqassanersoq siulittussallugu siusippallaarpoq, arsakummi siaruaannerat kisimi ukkinneqartussanngimmat. Tassa arsakut qanoq sualutsiginersut aaliangiisuulluinnartussaammat.
Nal. 20.00-illi tungaanut arsakut sualuppallaassangatinnneqanngillat.

- Tassa unnugu nal. 20.00-ip tungaanut arsakut ussippallaarnavianngillat, danskillu silaannaqarfiani ajornartorsiutaanaviarani, taama Søren Hedegaard Nielsen oqaluttuarpoq.

Innermik anitsisartut arsakuinik nakkutilliisoqarfii Volcanic Ash Advisory Centres nal. akunneri arfinilikkaarlugit ilimasaarusiortarput, aatsaallu ualippat nal. 20.00-ip kingorna qanoq pisoqassanersoq ilimasaarutigiumaarpaat, taama Søren Hedegaard Nielsen naggasiivoq.