Future Greenland: Sulisitsisut pisortaat coronamut tunngatillugu isumalluartoq
Kalaallit Nunaanni Sulitsisisut pisortaata Christian Keldsenip suli upperiuarpaa, corona Kalaallit Nunaata avataani tuniluukkaluartoq Kalaallit Nunaanni ataatsimeersuartarnerit annersaata, Future Greenlandip, maajip qaammataani ingerlanneqarnissaa.
Future Greenland ukioq allortarlugu ingerlanneqartartoq, nunatsinniit nunanillu allaniit peqataasorpassuaqartarluni Kalaallit Nunaanni ataatsimeersuartarnerit annersarivaat.
Ataatsimeersuarnissap taamaatinnarneqarsinnaanera Sulisitsisunit eqqarsaatigineqanngilaq, Christian Keldsen Brian Buus Pedersen taarserlugu pisortanngorsimasoq erseqqissaavoq.
- Illersorneqarsinnaanngitsumik iliuuseqarneq ajorpugut, malittarisassallu sukkulluunniit atuuttut malittarlutigit. Mianersortumik naatsorsuutigaarput, Kalaallit Nunaanni maanna pilersaarutaasut aamma akiuussutissap atuutilernera eqqarsaatigalugit, ataatsimeesuarnissap nalaani Kalaallit Nunaanni pissutsit nalinginnaasunngoqqissimanissaat, soorlu Covidimut atatillugu EU-mi suliaqartoqarneranik malinnaanerput pissanganartuusoq, Christian Keldsen Sermitsiaq.AG-mut oqarpoq.
Nunanit allanit peqataasussat
Ataatsimeersuarnissaq hunnorujulikkaanik peqataaffigineqartussaq maajip 18-iani 19-ianilu Katuami Nuummiittumi ingerlanneqartussatut pilersaarutaavoq, Kalaallit Nunaanni politikkerit nuimasut saniatigut ministeriusimasoq Lars Løkke Rasmussen aamma Sverigemi ministeriusimasoq Carl Bildt kiisalu Dansk Industrimi pisortaq Lars Sandahl Sørensen oqalugiartussat ilagaat.
Sulisitsisut pisortaata ataatsimeersuarnissaq taamaatiinnarneqassappat qaqugu isummertoqassanersoq oqaatigerusunngilaa.
- JSuli upperaara Future Greenland 2021 covid-19-ip kingorna siullersaalluni najuuffigineqarluni ataatsimeersuarumaartoq, soorlu pissutsinnut naapertuuttumik allannguisoqassanersoq isummertinnata, piffissami matumani pissusiviusut, tunillatsissimasut qanoq amerlatigineri, innersuussutit, malittarisassat il.il. isummerfigiuartariaqarivut, Christian Keldsen erseqqissaavoq.