GA: Avissaartuunneq pisariaqartinneqanngilaq
Sulisitsisut Peqatigiiffiata uggoraa aalisariutaatilli marlunnut avimmata Sinerissami Qanittumi Avataanilu Aalisariutaatillit Peqatigiiffiata pilersinneqarneratigut.
Peqatigiiffik pilersinneqarpoq oqaloqatigiissutigineqaqqaarnani soorlu assersuutigalugu Kalaallit Nunaanni Sulisitsisut Peqatigiiffiat (GA) oqaloqatigineqaqqaarnani, tamannalu GA-mit eqqumiigineqarpoq, tamannami pivoq piffissami inuiaqatigiinni aallat inuussutissarsiortut aamma inuiaqatigiit akornanni ataatsimoornissap aamma suleqatigiinnissap sulissutigineqaruttulernerani, Henrik Leth allappoq.
- Maanna namminersornermut iseriartulernermi kiissalu unammilligassarpassuit Kalaallit Nunaanni tikinneqartut, taava aatsaat taamak pisariaqartigilerpoq maani nunami inuussutissarsiornermik pingaarnermik ingerlatsisut siuttuisa isumaqatigiinniarusussuseqarnermik aamma ataatsimoorluni suleqatigiissinnaanermik takutitsinissaat niueqatigiiffik pitsanngorsaniarlugu. Isumaliortoqarsinnaavormi angallataatillit KNAPK-imit, maannakkut aaqqissuussaanera eqqarsaatigalugu, pitsaamut sullinneqarnatik misisigusunut iluarsiissutissamik nassaartoqarsinnaasoq - KNAPK-ip ataannarsinnaaneranut tunngavissat aserorternagit, GA tusagassiorfitsigut nalunaarummi allappoq.
GA-mit eqqumiigineqarluinnarpoq peqatigiiffiup nutaap pilersinneqarnissaanut Royal Greenland suliniutillit ilagimmassuk. Taamaalilluni RG-imit KNAPK-mik suleqateqarneq atorunnaarsinneqarsimavoq, naak kattuffik taanna tunngaviusumik isumaqatigiissuteqarfigineqaraluartoq atorunnaarsinneqarsimanngitsumik taamaattumillu suli atuuttuusumik.
- Taamaattumik qularutigineqarsinnaanngilaq Royal Greenlandip illuinnaasiorluni aalajangernermigut KNAPK-imit aserorterilluinnartumik aaqqiagiinngissuteqarnermut akisussaanerpaajusoq. Aaqqiagiinngissuteqarneq Kalaalit Nunaani inuussutissarsiumik artorsartitsilluinnarsinaasoq. Taamatut alloriarneq suli eqqumiinnerulerpoq tunngaviusumik isumaqatigiissummi tunngavigineqarmat tamarmik kissaatigisaaat suleqatigiikkusunnermik aamma ataqqeqatigiinnermik takutitsinissaq.
Taamaattumik GA-mit sakkortuumik kaammattuutigineqarpoq suleqatigiinnissamut periarfissat tamarmik misissorneqarnissaat - kiisalu ukiuni aggersuni nunarsuaq tamakkerlugu unammilligassanut tunngatillugu inuussutissarsiuteqarnerup periarfissai aserorternagit.
- Pisariaqartinneqartoq tassaavoq Kalaallit Nunaanni aalisarnermi periarfissat annertusarnissaat, nukillaarsaanerunngitsoq, GA-mi pisortaq Henrik Leth tusagassiutitigut nalunaarummi allappoq.