GA-p namminersorneq qanoq akeqarnersoq paaserusuppaa
Sulisitsisut misissueqqissaarlutik aallartinniarput, tassuunakkut paasiniarlugu naminersorneq kingornatigullu namminiivinneq qanoq akeqarnersoq sunillu piumasaqaatitaqarnersoq.
Namminersornerup eqqunneqarnera qanoq akeqarpa aamma inuiaqatigiinnut kalaallinut suna piumasaqaataava? Apeqqut taanna Kalaallit Nunaanni Sulisitsisut Peqatigiiffiara akissutissarsiniarpaa, tamanna erserpoq GA-p siulittaasuata nalunaarutaani ullumi ataatsimeersuarnermi saqqummiunneqartumi.
Taamaattumik peqatigiiffik misissueqqissaarluni aallartinniarpoq - imaluunniit kingunerisassaanik natsorsuiniarpoq - namminersornerup aamma namminiilivinnerup eqqunneqarnerata piumasaqaatitaanik. Misissueqqissaarneq immikkut ilisimasalinnik avataaneersunik Kalaallit Nunaanni pissutsinik ilisimasaqarluartunik suliarineqassaaq, GA-p siulittaasua Henrik Sørensen nalunaarpoq. Naqissuserpaalu maannakkut aatsaat taamak pingaaruteqartigilersoq oqartussaasut sukumiisumik aamma piffissaq ungasissoq eqqarsaatigalugu pilersaarusiornissaat. GA-p misissueqqissaartitsinera qaammatit sisamat-tallimat ingerlaneranni naammassineqariissaaq.
Kalaallit Nunaanni Sulisitsisut Peqatigiinni suliffeqarfiit 400 sinnerlugit ilaasortaapput taakunanilu sulisut 6.000-it sinneqarput. Kingullermik 2007-imi ataatsimeersuartoqarnerata kingorna GA aamma sulisitsisut peqatigiiffiat ILIK kattupput, kiisalu Henrik Sørensenip nalunaarutimi pingaartippaa oqaatigissallugu, Kalaallit Nunaat unamilligassanik annertuunik ornigaqartoq, tamatumalu pisariaqalersikkaa inuiaqatigiit akornanni suleqatigiinnissaq kikkut tamaasa eqaarsaatigalugit - sulisartoqarnermi illuatungeriit akornanni aaamma namminersornerusut ilanngullugit.