Raajarpassuit?
GE-p raajarniarneq suli mianernartoqartippaa
Sulisitsisut Peqatigiiffiat isumaqarpoq raajartassiissutit ukiumiit ukiumut taamarsuaq amerlineqartariaqanngitsut
Sulisitsisut Peqatigiiffiata nuannaarutigaa Kitaani raajat amerleriangaatsiarsimagunarmata, ippassaq Pinngortitaleriffiup aappaagumut raajartassanut inassuteqaamminik saqqummiussinerata kingorna.
Biologit inassutigaat raajartassat 60.000 tonsiniit 90.000 tonsinut amerlineqassasut, tupaallannartumik 30.000 tonsinik amerlillugit.
Taamatut nutaamik naliliisoqarpoq raajat piffissami sivisuumi ikiliartoreersimasullu.
Suli mianersortumik
Sulisitsisulli Peqatigiiffiatali raajarniarnerup suli mianersuunneqarnissaa kissaatiginartippaa, tunngavilersuutigalugu Kitaani raajarniarnermi ingerlatsinissamut pilersaarut maanna atuuttoq.
– Tassani allassimavoq pisassiissutit ukiumiit ukiumut 12,5 procentit qaangerlugit nikisinneqartassanngitsut, amerlillugit ikilisillugilluunniit, tamannalu GE-p Aalisarnermut Siunnersuisoqatigiinni oqaluuseritinniarpaa, peqatigiiffiup pisortaa Brian Buus Pedersen tusagassiorfinnut nalunaarutikkut allappoq.