GFLK: Nipisannik tuniniaaneq inerteqqutaavoq
Nipisat aamma nipisat suai suli ammaanneqanngillat. Aalisarnermut naalakkersuisoqarfik aamma GFLK erseqqissaapput tamanna isumaqartoq nipisannik aamma suaannik tuniniaaneq inerteqqutaasoq.
Nipisaat aamma nipisat suaat suli ammaanneqanngillat. Taamaammat kalaalimineerniarfinni, neriniartarfinnut Facebookikkulluunniit nipisannik suaannillu tuniniaanerit inerteqqutaapput.
Aalisarnermut piniarnermullu naalakkersuisoqarfik aamma Kalaallit
Nunaanni Aalisarsinnaanermut Akuersissutinik Nakkutilliisoqarfik tusagassiorfinnut nalunaaruteqarluni erseqqissaavoq.
- Nipisannik nipisalluunniit suaannik tuniniaallunilu pisineq maleruagassanik unioqqutitsineruvoq, akiliisitsisoqarsinnaalluni.
Kalaallit Nunaanni aalisarsinnaanermut akuersissutinik nakkutilliisoqarfik nipisannik aamma nipisat suaannik tuniniaasoqarnera pillugu saaffigineqarsimasoq, Aalisarnermut, piniarnermut nunalerinermullu naalakkersuisoqarfimmi immikkoortortaqarfimmi pisortaagallartoq, Katrine Kærgaard Sermitsiaq.AG-mut ilisimatitsivoq.
Nipisat ukioq manna pisassat 1.229,4 tonsiupput.
Tunisineq suli ammanngilaq
Nipisannik aalisarneq suli ammanngilaq, taamaattumillu tuniniaaneq inerteqqutaalluni.
Nalunaarut atuuttoq naapertorlugu Aalisarnermut, Piniarnermut Nunalerinermullu Naalakkersuisoqarfiup aqutsiveqarfinni ataasiakkaani nipisanniarnissaq aallarteqqusinnaavaa sumiiffinni tunisaqarnissamut sinniisuutitat aamma aalisartut kattuffiat isumaqatigiissuteqarfigereerlugit.
- Naalakkersuisoqarfik sumiiffinni tunisaqarnissamut sinniisuutitanit aamma aalisartut kattuffiannit nipisanniarnissap ammaneqarnissaanut tunngasumik maannamut suli saaffigineqarsimanngilaq, taamaammat aqutsiveqarfinni nipisanniarnissamik maannamut ammaasoqanngilaq.
Aalisarneq ammaanneqarpat aatsaat aalisartoqarsinnaalissaaq, aalisarnerlu ullunik 60-inik sivisussuseqartussaassalluni. Nipisanniarnerup nalaani inuussutissarsiutigalugu aalisartut kisimik tuniniaasinnaatitaapput.