Great Greenland isornartorsiuisoqaraluartoq suleqatigiinnermik aalajangiusimannippoq
Taamaattorli ammerivimmit oqallinneq tusarnaarneqarpoq saqqummiunneqartullu allannguinissamut atorneqassallutik.
Qallunaap eqqumiitsuliortup Jim Lyngvildip assilisai nittartakkani inuit attaveqatigiittarfiini ulluni kingullerni oqallinnermik pilersitsipput. Assilisani inuit puisit amiinik timmissat meqquinik kusassakkanik assigiinngitsunik atisalersorsimasut takutinneqarput.
Eqqumiitsuliortoq Ilulissani Eqqumiitsulianik Katersugaasivimmi saqqummersitassanik assiliisaqattaarsimavoq, puisillu amii Great Greenlandimit atugassiissutigineqarsimallutik.
Isornartorsiuisulli ilaat isumaqarput, Jim Lyngvildip assilisai uniusorujussuusut:
- Tissisaarisartunut inuusanullu saqqummersittakkanut assinguvugut. Tamanna akerleraara, ilaatigut Klaudia Petersen, TV2-mi aallakaatitami Go Aften Livemi oqarpoq.
Qiterisaa paasisimanngikkaa
Klaudia Petersen TV2-mi nangilluni isumaqarnerarpoq, Jim Lyngvildip kalaallit allanertatut alutornartutut saqqummiukkai, eqqumiitsuliortullu kalaallit kulturiata qiterisaa paasisimanngikkaa.
Jim Lyngvild nammineq oqarpoq, assilisani maniguuttorujussuulluni Kalaallit Nunaannullu asannissuseqartorujussuulluni suliarisimagini.
Taamatut oqallittoqaraluartoq Great Greenlandip Namminersorlutik Oqartussanit pigineqartup Jim Lyngvildimik suleqateqarneq aalajangiusimagaa, siulersuisut siulittaasuat, Juliane Henningsen, oqarpoq.
- Jim Lyngvild Danmarkimi avatangiisini puisit amiinik atuinissamik pingaartitsisuuvoq, tamatumanilu puisit amiinik ilusilersukkat atorlugit atisalianik nittarsaasseqataalluni. Allanik suliaqarnera uagut sunniuteqarfiginngilarput, kisianni oqallinnerit tusarnaarpavut, Juliane Henningsen oqarpoq.
Sooq qallunaaq eqqumiitsuliortoq?
Klaudia Petersenip TV2-mi aallakaatitami, sooq qallunaap eqqumiitsuliortup puisit amiinik Great Greenland sinnerlugu nittarsaassinissamik suliassinneqarsimanera apeqquserpaa.
Apeqqut: Sooq kalaallimik ilusilersuisartumik suliassamut toqqaasimanngilasi?
- Great Greenlandip suliassaani pingaarnerpaaq tassaavoq puisit amiinik tunisaqartarnermik pilersitsinissaq piujuaannartitsisumik puisinniarneq attanneqarsinnaaqqullugu. Saaffiginnissut kalaallimit ilusilersuisartumit takkussimagaluarpat, aamma akuersisimassagaluarpugut.
- Suleqatigiinnerit suliffeqarfimmut nalilinnik pilersitsisut tamaasa peqataaffigisarpavut.
Oqarluartaarnermit uumissuerpaluttumit ipitinneqarsinnaasoq
Apeqqut: Suli isumaqarpit Jim Lyngvildimik suleqateqarneq Great Greenlandimut nalilinnik pilersitsisoq?
- Aap, isumaqarpunga, isumaqarluartoq. Oqallinnermi nipi isumaqatiginngilara. Torernerusumik oqallinnissaq pikkoriffiginerusariaqarparput, taamaanngippat oqallinneq oqarluartaarnermit uumissuerpaluttumit ipitinneqassammat. Isornartorsiuinermut tusarnaarpugut tusaasavullu Great Greenlandip suli pitsaanerulersinnissaanut atussallugit, Juliane Henningsen oqarpoq.
Allagarsiussami matuma ataaniittumi Jim Lyngvildip assilisaasa oqallinnermut pissutaasut ilaat takuneqarsinnaapput: