Great Greenland: Nittartagaq kalaallisuumut nutserneqarpoq
Jim Lyngvildip inuit puisip amiinik atukkersorsimasunik assiliaatai pillugit oqallinnermi Great Greenlandimut isornartorsiuineq aamma ilannguppoq. Suliffeqarfiummi nittartagaanik kalaallisut oqaatsinik allassimasoqanngilaq. Suliaraarput, suliffeqarfik ilisimatitsivoq.
Inuit puisip amiinik atukkersorsimasut pillugit Jim Lyngvildip eqqumiitsuliaralugit assiliaanut tunngatillugu Great Greenland, amernik tunniussisuuginnaraluarluni, oqallinnermut ilanngutinneqarpoq.
Great Greenlandillu nittartagaa ilanngullugu isornartorsiorneqarpoq. Nittartagami nunatsinni oqaatsit pingaartinneqartut atorlugit allagartaqanngilaq. Tassa kalaallisut.
TV2-p aallakaatitassiaani Go’ Aften Livemi Klaudia Petersenip Great Greenlandip nittartagaa qallunaatut aamma tuluttut oqaasertaqarnera apeqquserpaa.
Suliffeqarfimmi pisortap Preben Møllerip oqaatsit pineqartillugit nittartakkap isornartorsiorneqarnera aatsaat tusalinngilaa. Kalaallit pisisartut nittartakkap kalaallisut allagartalersorneqarsimannginneranik isorinnittareersimapput, nittartakkamimi qallunaatut aamma tuluttut oqaatsit atorlugit taamaallaat allagartalersuisoqarpoq.
Kalaallisoortaa ukioq manna naatsorsuutigineqassaaq
Eqqissisaavorli. Allamiut oqaasinit kalaallisuumut nutserinissamut suliniut aallartinneqareersimavoq.
- Nittartakkap kalaallisuunik allagartaqalernissaanut suliaq pimoorullugu aallarteqqinnikuuarput. Suliaq siorna aallartippoq. Neriuutigaara kalaallisut allagartalersuineq ukioq manna naatinnagu naammassiumaartoq, Preben Møller Sermitsiaq.AG-mut oqarpoq.
Great Greenlandip nittartakkakkut niuertarfia suliffeqarfiup Danmarkimi Glostrupimi immikkoortortaqarfianit aqunneqarpoq. Preben Møller oqaluttuarpoq nittartakkap oqaasertaasa nutserneqarnerat ukiut siuliini aallartinneqarsimagaluartoq, nittartagalerisulli atortui aporfiummata suliaq unitsinneqarsimagaluartoq.
Nittartakkalli allagartai suliffeqarfiup avataanit nutserisulerluni maanna nutserneqassasut suliassanngortinneqareerpoq. Taamaasillutik kalaallit niuerniartut Great Greenlandip nittartagaani kalaallisut atuarlutik misissuisinnaalertussanngorlutik.
- Naatsorsuutigaarput 2022 naatinnagu oqaatsit kalaallisut, qallunaatut aamma tuluttut atorlugit nittartagarput allagartaqalerumaartoq. Soorunami apeqqutaavoq nutserisut qanoq sukkatigissanersut, Preben Møller oqarpoq.