Greenland Brewhouse Danmarkimi pisiniarfinnik isumaqatiginninniarpoq
Narsami immiorfiup avataaniit tikisitsisartuni soraarsippaa namminerlu qallunat pisiniarfiinut uigulukuttunut nassiussisarneq isumagisarilerlugu.
Greenland Brewhouse-p pisortaa Salik Hard sapaatip akunnerani uani Danmarkiliassaaq immiaaraq Narsami immiugaq pisiniarfinnut uigulukuttunut arlalinnut tunineqarsinnaanissaa isumaqatiginninniutigiartorlugu.
Immiorfiup suliffimmik Premium Beer Import-imik Kolding-imiittumik Narsap immiaaraataata tuniniartarneranik isumaginnittuusumik suleqatigiinnini 2007-imi atorunnaarsippaa. Taamaalilluni Greenland Brewhouse-ip nammineerluni qallunaat pisiniarfiinik isumaqatiginninniarsinnaanerpoq.
- Avataaniit eqqussuinermik suliffeqarfimmik suleqatigiinnermut atorunnaarsitsinermut peqqutit arlaqarput. Taakku ilagaat immiaaqqap sumut tunineqarnissaa. Uagut kissaatigaarput, immiaaqqat Danmarkimi tuniniakkavut pisiniarfissuarni pitsaasuni soorlu Irma-mi tuniniarneqarnissaat. Uagut kissaatiginngilarput immiaaqqap akikitsunik pisiniarfinnut attuumatinneqarnissaa, Salik Hard nassuiaavoq.
Pisortap pisiniarfiit uigulukuttut sorliit isumaqatiginiarneqarnersut oqaatigerusunngilaa.