Greenland Day: Torontomi saqqummersitsineq ussagarneqarluartoq
Nunarsuarmi aatsitassarsiornermik saqqummersitsinerit annersaanni PDAC-imi, ulluni makkunani nunarsuarmit tamarmeersunit 25.000-t missaanniittunit najuuffigineqartumi, Namminersorlutik Oqartussat Sulisitsisullu Greenland Day-imik aaqqissuussimmata inissat tamakkerneqarput.
Naak Torontomi aatsitassarsiornermik saqqummersitsinermi pisorpassuit unammillertit amerlagaluaqisut, Kalaallit Nunaat aatsitassarsiorfiusutut assigiinngitsunik sammisaqarfiusutut, soorlu politikkikkut, niuernikkut ujarassiornikkullu saqqummiunneqarmat soqutigineqarluarpoq.
- Suliffeqarfiit 32-t aallartitanut ilaapput, taakkualu saniatigut kalaallit suliffeqarfii arlallit aallartitanut toqqaannartumik ilaanngitsut, soorluttaaq suliffeqarfiit Kalaallit Nunaanni akuersissummik piginnittut ingerlatsisullu arlallit aamma maaniipput, Sulisitsisut pisortaat Christian Keldsen Sermitsiaq.AG-mut oqarpoq.
Aallartitat amerlasuut
Aatsitassarsiornerup qanoq ingerlasarneranik, misissuillunilu aatsitassarsiornermik suliniutit Kalaallit Nunaannit soqutigineqartut pitsaasunik atugaqarnissaat qanoq pingaaruteqartigisoq paasinninnissaq pingaaruteqarluinnarpoq, taamaalillutik misissuinerat naammassisinnaaqqullugu aningaasalersorneqarnissaallu qulakkeersinnaaqqullugu, suliniutillu piiaaffittut ingerlanneqarsinnaalernissaat angusinnaaqqullugu, Christian Keldsen nassuiaavoq.
Sapaammi oqallittoqarmat EU-Kommissionip ataani DG Grow-imeersoq Kerstin Jorna aamma Greenland Resourcesimeersut Bo Lidegaard, Kaya Partners aamma Ruben Shiffmann Aatsitassanut Naalakkersuisup Naaja Nathanielsenip oqaloqatigai.