Greenland Expo kommuunip allaffissuani
Kalaallit inuussutissarsiutinik ingerlatsisut namminersornerup eqqunneqarneranut nalliuttorsiornermut atatillugu nunanit allaneersunut Nuummut tikissimasunut immikkut ittumik saqqummersitsinermikkut qanoq piginnaaneqarnerlutik takutinniarpaat.
Inuussutissarsiutit pillugit saqqummersitsineq immikkut ittoq Greenland Expo - Business and Investment Potential tikeraanut nunanit allaneersunut kommuunip allaffissuani arfininngornermi junip 20-ani nal. 15.00 ammarneqassaaq.
Namminersornerup eqqunneqarneranut atatillugu Kommuneqarfik Sermersooq, Namminersornerullutik Oqartussat, Kalaallit Nunaanni sulisitsisut, Branding Greenland, Nusuka, KANUKOKA aamma GTE suleqatigiissutigalugu ErhvervsExpo-mik Kommuneqarfik Sermersuup allaffeqarfissuani ingerlanneqartussamik aaqqissuussisuupput.
Saqqummersitsineq suliffeqarfiit namminersortut pisortatigoortullu arlalissuit peqataaffigissavaat. Saqqummersitsinerlu aqqutigalugu suliffeqarfiit suliaminnik tunisassiaminnillu tikeraanut nunanit allaneersorpassuarnut nittarsaassiniarput. Suliffeqarfiit, ilusilersuisartut eqqumiitsuliortullu 27-t Greenland Expo-mi saqqummersitseqataassapput.
- Attaveqateqalernissamut tunngaviliisussaavoq, taamalu nunamit tunisasassiat annissugassatigut aammalu aatsitassarsiornermi uuliasiornermilu attave-qaasiorsinnaanissamut tunngaviliisinnaavoq, Ellen Arnskjold, Kalaallit Nunaanni sulisitsisuni siunnersorti taama oqarpoq.
Inuussutissarsiutitigut susassaqartut saqqummersitsinermi nunanit namminersortunit 20-neersunik naapitsinissaq periarfissaraat. Grønlands ErhvervsExpo-mut peqataasussat 95-it angumavaat, taakkununngalu ilaapput politikkikkut aqutsisut nunani avannarlerneersut Nuna-vut-neersullu, nunarsuarmi tamaneersut aallartitaat USA-p, Ruslandip Japanillu aallartitaat siuttoralugit. Aammattaaq tusagassiorfinneersut 35-t pisunik malinnaaqataassapput.
Nal. 16.00 oqalugiartoqassaaq, nunanillu allaneersorpaasuit Kommuneqarfik Sermersuumi borgmesterimit Asii Chemnitz Narupimit, naalakkersuisunngortumit aammalu Nukissiorfiit pisortaannit Svend Hardenbergimit tikilluaqquneqassapput.
Nuummi innuttaasut saqqummersitsinermut arfininngornermi junip 20-ani nal. 17.00-19.00 takuniaasinnaapput.