Greenland Minerals and Energy pisortartaarpoq
Ole Ramlau-Hansenip Johannes Kyed suliffeqarfimmi pisortatut taarserpaa
Greenland Minerals and Energy 2007-mi aallartimmalli Johannes Kyed qullersatut pisortaasimavoq. Ingerlatsiviup siulersuisuini siulittaasoq Lars-Emil Johansen nalunaarpoq, Johannes Kyed nammineerluni tunuarniuteqarsimasoq, kisianni ingerlatsivimmut suli attuumassuteqartussaasoq.
- Greenland Minerals and Energyp pilersikkiartuaarnerani ajunngilluinnartumik tunngaviusimavoq, Lars-Emil Johansen oqarpoq.
- Greenland Minerals and Energyimi Ole Ramlau-Hansen pisortatut ingerlatsivik suliassanut piumasaqaateqarfiussaqisunut piareersimalluassaaq, tamakkulu Narsarmi Kuannersuarni piiaasoqarsinnaaneranut tunngatilluu misissueqqaarnernut tunngasuupput. Qaammatit arlalialunnguit qaangiuppata politikkerit aalajangiisussaapput misissuinerit taakku ingerlatiinnarneqassanersut imaluunniit piaanissaq taamaatiinnarneqassanersoq, Lars-Emil Johansen oqarpoq.
Ole Ramlau-Hansen nunatsinni inuussutissarsiornermik ingerlatsisut akornanni ilisimaneqarluarpoq. Kingullermik Royal Greenlandimi pisortaanertut atorfeqarpoq. Greenland Mining Services A/S-imit piginneqataallunilu siulersuisuni siulittaasuuvoq.
Ingerlatsiviup taassuma ulluinnarni ingerlanneqarnerani Ole Ramlau-Hansen tunuassaaq Greenland Minerals and Energymi pisortaaninngornerminut atatillugu, kisiannili Greenland Mining Services A/S-imi siulersuisuni siulittaasutut ingerlaannassalluni.