KL

DK

Greenland Minerals: Suna tamaat angullugu sulissaagut

Naak inatsisaasut aallaavigalugit pisinnaanngikkaluartoq Greenland Minerals Kuannersuami piiaanissamut isumaqatigiissuteqalernissaq suli anguniarpaa. Suliffeqarfik sinnerlugu Australiamit Narsamiillutillu Nuummeeqqammerput.

MERETE LINDSTRØM

Suliaq qanoq inissisimanersoq paasiniarlugu Australiameersut Narsamiillutillu Nuummeeqqammerput. Inatsisitigut sukaterisoqarnikuugaluartoq Kuannersuarni piiaanissamik isumaqatigiissuteqarnissartik suli upperaat. Saffiugassanik qaqutigoortunik Greenland Minerals piiaanissamut suliniuteqartuuvoq, taakkulu bateeriliornernut, biilinik innaallagiartortunik pilersitsinermut, oqarasuaatinut angallattakkanut allanullu atortorissaarutinut atorneqartartuupput.

Urani saniatigut tunisassiarineqartussatut siunnerfigiuvoq, 50 millioner dollarsinik isertitaqarnissaq naatsorsuutaalluni.

Inatsisit atuuttut​​​​​​

Aatsitassanut inatsit §29
Piginnaatitsissummik pigisaqartoq imm. 1 malillugu akuersissuteqarnerup nalaani pisuussutinik aningaasarsiutigalugu atorluarneqarsinnaasunik uppernarsaasimappat sumiiffissiisimallunilu, akuersissummilu piumasaqaatit aalajangersarneqarsimasut eqquutsissimappagit, piiaanissamut akuersissummik tunineqarnissaminut pisinnaatitaavoq.

Uranimik piiaanermullu inerteqquteqarneq pillugu Inatsisartut inatsisaat

§ 1. Uranimik misissueqqaarneq, uranisiorluni misissuineq aamma piiaaneq akuerisaanngillat.
Imm. 2. Misissueqqaarneq, uranisiorluni misissuineq piiaanerluunniit uranimut sammitinneqarani allamut sammitinneqarpat, agguaqatigiissillugu uranimik akoqarnera 100 ppm inorlugu oqimaassuseqarpat, imm. 1-imi aalajangersagaq atuutissanngilaq. (Kuannersuarni 300 ppm missaanniippoq)

Inatsisartut uranimik misissuisinnaaneq, ujaasineq piiaasinnaanerlu inerteqqutinngortinnikuaat, taamaasilluni Kuannersuarmi suliniutip piviusunngornissaa ilimanarunnaarluni. Naalakkersuisut Kuannersuarni piiaanisssamut Greenland Mineralsimut itigartitsissummut missingiummik tusarniaassummik nassiussipput aasaq.

Inatsit qanoq isumaqarnersoq apeqqutaavoq

Greenland Mineralsip niuernikkut manageria, Garry Frere, oktobarip naanerani akissuteqarumaarlutik naatsorsuutigalugu Sermitsiaq.AG-mut oqaatigaa.

Greenland Mineralsimut itigartitsissut eqqortuliornerunngitsoq oqaatigaa. Taamaattumik Greenland Minerals Namminersorlutik Oqartussanut Naalagaaffimmullu Danmarkimut suliassamik aallartitsivoq.

Oqaaseqaatit pingasunngorlugit aggulunneqarsinnaasoq Garry Frerep oqaatigaa, ima: misissueqqaarnermut, ujaasinermut piiaanermullu inatsit.

- Inatsisilerineq pillgu oqallinnerunngilaq, inatsimmi atuutilinngitsoq ujaasisoqarnikuuvoq, taamaattumik tamannartaa ajornartorsiutitaqanngilaq. 'Piiaaneq' aningaasarsiornissamut siunnertaappat, suliniut ingerlatinneqaqqissinnaavoq. Urani tuniniarnagu tailingsitut iligaanni suliniut ingerlatinneqaqqissinnaavoq.

Aningaasaliissutaasut utertinneqaqqissasut

Suliaq unitsinneqarluinnassappat aningaasatigut kinguneqartitsisoqartariaqartoq Garry Frere isumaqarpoq.

- Qaaqquneqarsinnaanngilagummi innersuunneqarlutalu misissuisinnaasugut ukiuni 15-ni, tamannalu kingorna suliniut itigartinneqarluni. Inatsisitigummi piumasaqaataasut angoreerpagut, nalunaarusiornikuuvugut, avatangiisinut inuiaqatigiinnullu sunniutissai akuerineqartumik nalunaarusiorfigeraarpagut.

Taamaattumik piumasaqaataat ersarippoq, naqissusiivoq.

- Aningaasaliissutigisimasagut tamarmik minnerpaamik utertinneqartariaqarput, aamma suliffeqarfittut isertitassaraluagut qaavatigut akiliutigineqartariaqarput. Taakku qaavatigut 130 millioner Australiamiut dollarii suliniummut aningaasartuutigisimasagut utertinneqartariaqarput.

Suliniut pillugu paasititsiuarnissaq

Suliassamik aallartitsinerat ukiuni arlaqartuni suliarineqarsinnaavoq. Taamaattumik suliniut pillugu pilersaarutit innuttaasunut paasititsiniaanerit ingerlanneqarniarput, aamma Narsami innuttaasut suliniummut tapersersuilernissaat neriuutigineqarpoq.

- Ilisimatuussutsikkut misissuinerit eqqortumik suliarineqarnikuusut takutippaat suliniut ulorianaateqanngitsuusoq. Suliniut pillugu nalunaarusiat pitsaanerusumik innuttaasunut paasissutissiisimasinnaagaluarpugut, tamannalu uagut akisussaaffigaarput.

Garry Frere oqarpoq, nangillunilu:

- Qanoq ingerlariaqqittoqassanersoq paasinarsiumaarpoq. Suliniummut tapersersuisut Narsarmiut eqqaanilu najugaqartut saaffigerusuppagut. Taakku taava paasissutissat inuiaqatigiinnut paasinartunngorlugu ingerlateqqissinnaavaat, suliniutip pilersinneqarnissaa ernumanartoqartikkunnaassavaat, taamaattumik Narsameeqqeqqammerpugut oqariartuutigut siammarterniarlugit.

inuussutissarsiutit nunatsinnit
Powered by Labrador CMS