Greenland Mineralsip Namminersorlutik Oqartussat eqqartuussivilersuuppai

Greenland Minerals A/S-ip eqqartuussissuserisussarsiorfitsik Plesner aqqutigalugu Namminersorlutik Oqartussat Kalaallit Nunaanni Eqqartuussivimmut suliassanngortippai.

Kuannersuarni aatsitassarsiornissaq uranimillu piiaanissamut inerteqquteqarneq pillugu akerleriinneq allanngorpoq.

Greenland Minerals A/S-ip eqqartuussissuserisut suliffeqarfiat Plesner aqqutigalugu ingerlatseqatigiiffiup Kuannersuarni piiaanissamut akuersissummik qinnuteqaataanut Naalakkersuisut itigartitsisimanerat pillugu, Namminersorlutik Oqartussat eqqartuussivilersuukkaa, Naalakkersuisut tallimanngornermi tusagassiuutinut nalunaarummi ilisimatitsipput.

Kalaallit Nunaata kujataani piiaanissamut akuersissummik tunineqarnissamut inatsisitigut pisinnaatitaalluni, aammalu uranimut inatsit atuuttussaanngitsoq, Greenland Minerals A/S-ip oqariartuutigaa.

Naalakkersuisut naapertorlugit eqqartuussisulersuussineq naatsorsuutigineqarsimavoq, tassami aatsitassanut inatsimmi aamma akuersissummi atugassarititaasuni allassimammat, Naalakkersuisut aalajangiinerisa isumaqatigiinngissutigineqarnerat eqqartuussivinni misilinneqarsinnaasoq.

Naalakkersuisoq ugguartoq

Pisoq pillugu Naalakkersuisoq Naaja H. Nathanielsen (IA) ugguarpoq:

- Eqqartuussisulersuussinissaq naatsorsuutigineqaraluartoq, uranimut inatsit taassumalu atuuffissai Greenland Minerals A/S-ip ataqqinngimmagit soorunami uggornartorujussuuvoq. Naalakkersuisut naatsorsuutigineqartutut, aammalu pisussaaffigisatsitut, inatsit malippaat. Naalakkersuisut suliassatta eqqartuussivimmi saqqummiussinnaanissaa qilanaaraat, Naaja H. Nathanielsen oqarpoq.

Aalajangersimasumik Naalakkersuisut, Naalakkersuisut Siulittaasuata Naalakkersuisoqarfia, Inuussutissarsiornermut, Niuernermut, Aatsitassanut, Inatsisit Atuutsinneqarnerannut Naligiissitaanermullu Naalakkersuisoqarfik, Nunalerinermut, Imminut Pilersornermut, Nukissiutinut Avatangiisinullu Naalakkersuisoqarfik, Aatsitassanut Ikummatissanullu Aqutsisoqarfik aamma Aatsitassanik Suliassaqarfinnut Avatangiisinut Aqutsisoqarfik  Greenland Minerals A/S-ip eqqartuussisulersuuppai.

Tamatuma saniatigut aamma Inatsisartut kiisalu Silap Pissusaanut, Nukissiuuteqarnermut Pilersuinermullu ministereqarfik eqqartuussisulersuunneqarput, Naalakkersuisut ilisimatitsipput.

- Isumaqanngilaq sianiilliornerullunilu

Periaaseq pillugu Naalakkersuisoq isornartorsiuivoq:

- Aalajangiinermut suliassaqarfimmi akisussaaffigilerlugu tiguneqarsimasumi Kalaallit Nunaanni Naalakkersuisunit aalajangiiffigineqartumut danskit ministereqarfiannik eqqartuussisulersuussineq isumaqanngilaq sianiilliornerullunilu, aammalu Inatsisartut ilanngunneqarnerat pissaanerup pingasunngorlugu avitaaneranik tunngaviusunik paasisimasaqannginnermik uppernarsaataavoq.

- Tamatumani siunertatuaasoq tassaavoq eqqissiviilliortitsinissaq aammalu sullissiviit suliamut attuumassuteqanngitsut aningaasaqarnikkut allaffissornikkullu nammakkersornissaat.

Tamatuma saniatigut isumaqatigiissitsiniarnermut suliassaq Greenland Minerals A/S-imit Namminersorlutik Oqartussat aamma danskit naalagaaffiat suliakkiullugu suliakkiissutigisaa suli ingerlavoq, tassani ingerlatseqatigiiffik Kuannersuarni piiaanissamut akuersissummik tunineqarnissamut pisinnaatitaanersoq isummeqqullugu Greenland Minerals A/S-ip isumaqatigiissitsiniarnermut eqqartuussivik qinnuigaa.

Powered by Labrador CMS