Greenland Venture eqqartuussivimmi ajorsarpoq
Aningaasaliisarfiup unammlleqatigiinnermut ataatsimiititaliap apeqqutaa akissuteqarfiginngitsoorsinnaanngilaa.
Apeqqut ataasinngormat Kalaallit Nunaata Landsrettiani aalajangiiffgineqarpoq.
Suliassaq Namminersorlutik Oqartussat aningaasaliisarfiannit suliakkiissutigineqarsmimavoq, taakku isumaqaramik Unammilleqatigiinnermik Nakkutilliisut inatsisit malinngikkaat, paaserusussimagamikku suliffeqarfiit sorliit aningaasatigut tapiiffigineqartarnersut tapiisarnermilu suut tunngavigineqartarnersut.
Eqqartuussiviullu isumaanik saqqummiussinertut taaneqartumi aalajangiunneqarpoq, Unammilleqatigiinnermik Nakkutilliisut Greenland Venture pillugu paasissutissanik piumasaqarsinnaasut - suliffeqarfik pisortat aningaasaliissutaat atorlugit unammillipilunnermik pilersitsinersoq paasisinnaajumallugu.
Tamanna tunulequtaralugu aningaasaliisarfik paasissutissanik, nakkutilliisoqarfiup qinnutigisaanik, tunniussinissamut pisussaaffeqarpoq.
Landsretti isummamik saqqummiussinertut taaneqartumik oqaaseqaateqarpoq, eqqartuussisullu Linda Hangaardip eqqartuussiviup aalajangigaa illuatungeriinnut saqqummiuppaa.
Eqqartuussiviullu aalajangigaa eqqartuussiviup allattaaviinut allanneqarpoq.
Greenland Venture, naak Namminersorlutik Oqartussanit pigineqaraluarluni, niuernermi piumasaqaatit nalinginnaasut malillugit ingerlasuunerarluni paasisutissanik tunniussiumasimanngilaq. Taamaattumillu taakku pisortatigoortumik tapiissutitut nalinginnaasutut isigineqarsinnaanngillat.
Greenland Venturep siulittaasuata Gerth B. Lyngep oqaatigaa, siulersuisut sapaatip akunnerani kingusinnerusukkut ataatsimeereerpata saqqummiussaq suliffeqarfiup oqaaseqarfigiumaaraa.