Greenpeace: Iliuuseqartoqarnissaa pisariaqartipparput

– Nuannaajallannarpoq Issittumi Siunnersuisoqatigiit siulittaasortaavata, USA-p nunanut allanut ministeriata John Kerry-p, tallimanngormat Iqalunni Issittumi Siunnersuisoqatigiinnut oqalugiarnermini erseqqissaatigimmagit silap pissusiata allanngoriartornera aammalu nukissap ataavartup pisariaqartinneqarnera. Aasaruli Shell-ip Issittumi uuliasiorluni qilleriniarnera Obama-p naalakkersuisuisa akuerissappassuk oqaatsit tamakkua imaqanngillat, Greenpeace-mi issittumut akisussaasoq John Burgwald Iqalunniittoq oqarpoq.

– Canada-p siulittaasuunerata nalaani Issittumi Siunnersuisoqatigiinni susoqarpianngereersoq maanna amerikarmiut siulittaasuuffiat atulerparput, siunniussallu neriunartoqarput, immaqa siullermeersumik iluamik siuariartortoqarsinnaalluni. Qanorli iliuuseqartoqarnissaa atorfissaqartipparput, John Burgwald erseqqissaavoq.

– Siulittaasuuffimmik tigusinerminut atatillugu oqalugiarnermini John Kerry-p aamma eqqaavaa Issittumi uuliamik ajutoortoqarnissaanut illersuutissaq pingaarnerpaaq tassaasoq pinaveersaartitsineq. Tamatumunnga pitsaanerpaaq atorsinnaasutuarlu tassaavoq Issittumi uuliasiorluni qillerinerit inerteqqutiginerat. Issittumi Siunnersuisoqatigiit issittumi avatangiisit nalissaqanngitsut illersornissaanik anguniagartik malissagunikku inerteqquteqarnissaq sulissutigissavaat, taanna naliliivoq.

– Amerikarmiut siulittaasuuffiat siusinnerusukkut neriorsuisimavoq issittup imartaani imarnik uumasoqarfinnik illersukkanik pilersitsiniarluni. Neriorsuut tamanna malinnaavigissavarput, tassa issittup imartai nunarsuarmi immani atugaannginnersaapput, sumiifiillu qanga immap sikuanik illersorneqarsimasut kilisaassuarnit uumassusiiarneqaleruttorput. Uumassuseqarneq illersorneqassaaq, aalisarnerlu kikkunnut tamanut tamaani najugaqartunut iluaqutaassaaq, Jon Burgwald oqarpoq.