Greenpeacep Aleqa nersualaarpaa
Imaani uuliasiornissamut akuersissutinik nutaanik tunniussinngikkallarniarlutik Naalakkersuisut aalajangernerat Greenpeacep nuannaarutigaa
Naalakkersuisooqatigiinnissamik isumaqatigiissut malillugu imaani uuliasiorniartunut akuersissutinik nutaanik tunniussisoqassanngikkallarpoq. Taama aalajangerneq Greenpeacep issittup imartaani uuliasiornermut akerliusup iluarisimaarpaa.
AAMMA ATUARUK: ALEQA: UULIASIORNIANUT AKUERSISSUTIT NUTAAT UATSI
Cairn Energy aamma uuliasiortitseqatigiit arlallit suliatik ingerlatiinnarsinnaavaat uulisiornissamut akuersissutini pigeriigaanni piumasaqaatit allanngornavianngimmata. Nunatsinni uuliasiornermut akerliulluni Greenpeace iliuuseqartareersoq akuersissutiniik nutaanik tunniussinngikkallarniarnermik iluarisimaarinnippoq.
- Naalakkersuisut ilimanarsisippaat Kalaallit Nunaanni uuliasiornerup nalunartoqarnerujussua malitseqartinniarlugu. Aamma matoqqanerujussuaq pissutigalugu navianaataasinnaasut pillugit innuttaasut suliffeqarfissuarnit iluamik paasitinneqartarsimannginnerannut tunngasut allanngortinniarneqarmat iluarisimaarnarpoq, Greenpeace Danmarkip issittoq pillugu akisussaatitaa Jon Burgwald oqarpoq.
Uninngillat
Akuersissutinik tunniussinngikkallarniarneq nalunaarneruvoq taamaattoq imaani uuliasiornerit akuerisaareersut ingerlaannassapput. Uuliasiornissamut akuersissutit arlallit tunniunneqareerput taakku ilaatigut 2017 aamma 2020 angullugu atuuttussaapput.
- Neriuppugut Kalaallit Nunaanni Naalakkersuisut imaani uuliasiornerup unikaallatsinnissaanik oqaaserisatik neriunartut malitseqartikkumaaraat tassami navianarsinaammat ammanerusumik ingerlatsinissaq pisariaqartinneqarpoq. Maanna neriuutigiinnarsinnaavarput tullertut iliuuserineqartoq tassaajumaartoq uuliasiornissamut akuerisaareersut qillerinissamut akuerineqassanngitsut ineriartornissamullu periarfissanik allanik Kalaallit Nunaat nassaarumaartoq neriuutigiinnassavarput, Jon Burgwald oqarpoq.