Greenpeacep immami itisuumi qillerisarneq unitseqquaa
Amerikami ataatsimiisitaliap uuliasiorfissuit nakkutigineqarnerulernissaat siunnersuutigaa. Greenpeace annertunerusumik piumasaqarpoq.
Amerikarmiut ataatsimiisitaliaata, Mexicanske Golfimi siorna aasakkut uuliamik mingutsitsinermik ajutoornerujussuup kingornatigut pilersinneqartup, siunnersuutigaa uuliasiorfissuit nakkutigineqarnerulernissaat ajutoortoqaqqinnginnissaa taamatut qulakkeerniarlugu.
Greenpeacemi silap pissusaa pillugu suleqataasup Jon Burgwald Barack Obamap ataatsimiisitaliamik pilersitsinera aamma suliaqarnerujussua nersortariaqarsoraa.
- Kisianni tassa ataatsimiisitaliap suliaata kingunera apeqqutaassaaq. Greenpeacemi uagut suliaqarpugut immap itisuup naqqani qillerinissanik nutaanik nunarsuarmi tamarmi atuuttussamik unitsitsiniarnermik, ingammik sumiiffiit mianernartut eqqarsaatigalugit, Jon Burgwald oqarpoq.
Taanna naapertorlugu tamanna uuliasiorfissuit soqutigisaannut akerliuvoq.
- Uuliasiorfissuit siorna aasakkut ajutoornersuaq ilikkarfiginngilaat, qillerinerillu aarlerinaateqartut amerlillugit, soorlu Issittumi Kalaallit Nunaata kitaata sineriaani, Greenpeacemi silap pissusaa pillugu suleqataasoq oqarpoq nangillunilu:
- Ilutigalugu sunniiniartartoqatigiinnut amerlaqisunik aningaasalersuipput sillimaniarluni tamatigut aaqqiissuteqarniarnermut akerliuniarnermik allatigullu killilersuiniarnermut namminneq pisariaqanngilluinnartumik uuliamik mingutsitsinertalissuarmik silarsuaminni aalajangersimasumik suliniuteqarlutik.
Taamatut Ritzau allaaserisaqarpoq.