Grønlandsbanken 2014-mi aallartilluartoq

Grønlandsbankenip aningaasaqarnikkut angusai pitsaasut ingerlaqqipput.

Grønlandsbankenimi suli akileraarusernagu 123 million koruuninik sinneqartooruteqartoq ukioq manna nalunaaruteqarpoq.

Ukioq 2014-ip aallartinnera pissutsinit arlalinnit sunnerneqarsimasoq banki tusagassiutinut nalunaaruteqarpoq. 2013-ip ingerlanera tamaat taarsigassarsisitsisarnerup apparnerata kinguneraa, 2014-ip aallartinnerani erniaatigut isertitat 2013-ip aallartinneranut naleqqiullugit ikinnerusimanerat.

- Akerlianik kvartalip ingerlanerani taarsigassarsisitsisarnerup qaffassimanera takullugu pitsaasuuvoq, tamatumunngalu ilutigitillugu sullitat pappilissanik nalilinnik aningaasalersuinerat qaffakkiartuinnarsimavoq. Obligationinik uninngasuuteqarnerup qaffannera, aningaaseriviup kvartalip siulliup anigorluarsimaneranut peqqutaaqataavoq, illutigitillugulu 2014-ip sinnerani tunngaviusumik isertitsissutaasartut naammaginartumik amerliartornissaat naatsorsuutigineqarluni, Nunatsinni bankit annersaat nalunaaruteqarpoq.

Ingerlalluarneq
- Tamatuma saniatigut Aasianni immikkoortortassap illussaata nutaap piareersarneranut atatillugu ulapputeqarsimaneq kvartalip siulliup sunnerneqaatigisimavaa. Taamattaaq Ilulissani aningaaseriviup illutaa nutarterneqarnera suliarineqarsimavoq marsip naaneranut iserterfigineqarnissaminut piareersarneqarsimalluni. Kvartalimi siullermi aningaaseriviup sulisui sullissinermik suliaqartut tamarmik annertuumik ilinniartinneqarsimaneri aallunneqarsimavoq. Siunissami aningaasarsiornissamut suliniutit piareersimaffiginiarluni aningaasaliissutitut isigineqassapput, tamatumalu akerlianik kvartalimi siullermi aningaasartuutit immikkut ittumik amerlingaatsiarsimasorujussuupput. Aningaaseriviup naatsorsuutiginngilaa taama qaffariarneq 2014-imi ingerlaannassasoq, taamaammallu patajaatsumik ingerlatsinissap nangeqqinnissaa suli naatsorsuutigalutigu..

- Nets-imik tunisinissaq eqqartorneqarsimasorujussuaq aningaasat nalinginik naleqqussaanerup malunnarluinnartumik qaffannerinut peqqutaanerpaajuvoq, taarsigassarsinernullu nalikilliliinerit qulanaveeqqusiinerillu amerlanngittuarsinnarmata kvartalimi inernerit 2013-imut naleqqiullugit qaffasinnerulaassapput, naammaginarluinnartumillumi qaffasissuseqarlutik.

Angusat:

• Akileraannginnermi inernerit 2,4 mio. kr.-inik amerleriarput 34,6 mio. kr.-inut, 2013-imi piffissamut tassunga naleqqiullugit.
• Inernerit ukiup aallartinnerani sinneqartooreernermi ukiumut 17 %-inik erniaalersuisuuppput.
• Ilanngaareerluni erniaat allanngunngillat – sullissinermilu akiliutitigut isertitat 68,5 mio. kr.-iullutik.
• Kvartalimi siullermi nalikilliliinerit kinguartitatigullu immikkoortitat taamaallaat 0,1 %-iupput.
• Aningaasartuutini qaffannerit 3,8 mio. kr.-isut IT-mut aningaasartuutinik, ataasiartumik aningaasartuutinik aamma immikkoortortamik pilersitsinermut ilinniartitsinermullu atatillugu aningaasartuutit amerlisimanerinut peqqutaanerpaajupput.
• Aningaasat nalinginik naleqqussaanermi qaffariaatsit 7,2 mio. kr.-iupput.
• Aningaasat nalinginik naleqqussaanerit aamma nalikilliliinerit sioqqullugit ukiumut sinneqartoorutissatut naatsorsuutigisat 125 aamma 145 mio. kr.-iunissaat allanngunngilaq, 2013-imi 135 mio. kr.-iusimallutik.
• Ileqqaakkat aamma taarsigassarsisitsinerit amerlissapput.
• Akiliisinnaassusermut procentit 20,2-iupput aamma akiliisinnaassusermut pisariaqartitat 10,8-iullutik.
• Aasianni immikkoortortap nutaap pisortatigoortumik ammarneqarnissaa.