Grønlandsbanken aallartilluarpoq

Grønlandsbankenimi ukioq naammagisimaarnartumik aallartippoq, taanna akileraannginnermi 49,4 mio. kr.-nik isertitaqarpoq. Tamanna 2022-mut kvartalimut siullermut sanilliullugu marloriaatingajaavoq, tassani aningaaserivik 26,8 mio. kr.-nik isertitaqarmat.

Pitsaanngitsortaani annaasat nalikilliliinerillu aningaaseriviup taarsigassarsiaqartinerani kr. 7 mio.-nut qaffariarput 2022-mut kvartal siullermi kr. 0,7 mio.-llutik.

Grønlandsbanken tusagassiuutinut nalunaarummi taama allappoq, tassanilu aamma aningaaseriviup 2022-mi obligationit nalingisa appasissimaneri pissutigalugit kr. 10,7 mio.-nit annaasat 2023-mi kr. 7,9 mio.-nik iluanaaruteqarnerit erseqqissaatigai.

Aningaaserivimmi kvartalimi siullermi taarsigassarsiarititat qularnaveeqqusiinerillu kr. 45 mio.-nik amerleriarput kr. 4.399 mio.-nut taavalu Nationalbankenip ernianik qaffaanerani sunniuteqaqataalluni, aningaaserivik ilisimatitsivoq:

Pisortaq: Aallartilluartoq

- Ukioq aallartilluarpoq. Taarsigassarsisitsineq siuariartorpoq isertitanullu sunniuteqarluni, aningaaserivimmi pisortaq Martin Kviesgaard oqarpoq, nangillunilu:

- Qaammatini 15-ni taarsigassarsisitsinerit 600 mio. kr.-t sinnerlugit amerleriarput, siuariarnerlu malunnaateqarpoq. Tamatumalu takutippaa Kalaallit Nunaanni inuussutissarsiornerup tungaatigut aningaasaliisoqarluarsimasoq, unammillersinnaanitsinnillu isumaqartippara.

Aningaaserivik naapertorlugu erniat qaffakkiartornerat, aningaasallu naleerukkiartorneranut annerusumik unammillernartunik suli malugisaqanngilaq.

Illuutillit aalajangersimasunik erniaqartinneqarnermikkut illersugaalluarput, taamaammat pingaarnertut siullermeerlutik inissiamik pisisimasut taarsigassarsinerup akitsorsimanera malugisinnaagaat, aningaaserivimmi pisortaq oqarpoq. Akerlianik atuisut annerusumik aningaaserivimmiittuutitaqartut maanna qaffasinnerusunik erniaqartitsiffigineqalerput.

Akit qaffakkiartornissaat naatsorsuutigigaa

Taamaattoq Martin Kviesgaardip akit qaffakkiartuinnarnissaat inuuniarnermilu aningaasartuutit qaffakkiartornerannik kinguneqarnissaat naatsorsuutigaa:

- Atuinermi malugineqarpoq akit qaffakkiartorneri aamma sanaartornermi. Nukissiutit akii ukiup naaneraniit akitsornissaat naatsorsuutigineqassaaq, sullitagullu naatsorsuutigissavaat inuuniarnermi akileraarutit qaffannissaat piareersimaffigissagaat.

- Kingunera nunani allani sanilliullugu annertutiginavianngilaq, aningaaserivimmi pisortaq oqarpoq.

Grønlandsbankenip 2023-mut naatsorsuutigisaat apriilip 24-iani qaffanneqarput akileraartinnani kr. 145-185 mio.-nut missaaniissasut 2022-mi 109,1 mio.-pput.