Grønlandsbanken iluanaaruteqarnerusoq
Grønlandsbanken siusinnerusukkut ilimagisanit 2020-mi iluanaaruteqarnerussaaq.
Grønlandsbankenimi piginneqataasunut nutaarsiassatsialaqarpoq.
Aningaasanik pappiaranillu nalilinnik niueruteqartarfimmut nalunaarummi, pingasunngornermi nassiunneqartumi, Grønlandsbanken paasissutissiivoq, akileraarutit suli ilanngaatiginagit ukiumut angusanut naatsorsuutigisani 110-125 milllioner koruunit akornanniit 128-131 millioner koruunit akornannut qaffakkani.
Inaarutaasumilli angusat qanoq inissisimanerat aningaaseriviup aatsaat nalunaarutigisinnaavai, ukiumoortumik nalunaarusiaq marsip 1-ani tamanut saqqummiunneqarpat. Aningaaserivik tamatuma kingorna marsip 24-ani ataatsimeersuassaaq.
Aningaaseriviup pisortaata Martin.Kviesgaardip angusat pitsanngoriaateqarnerannut nassuiaatissap suunera Sermitsiaq.AG-mut itisilerusunngilaa, taamaallaalli aningaasanik pappiaranillu nalilinnik niueruteqartarfimmut nalunaarut naatsoq innersuussutigalugu.
Aningaasatigut niuerfiit
Taamaakkaluartoq uissuummissutaanavianngilaq, 2020-mi isertitat amerlanerusut ilarpaalussuinut aningaasatigut niuerfinni aningaasaatit pitsaanerusumik erniaqartinneqarsimanerannik pissuteqarsimappata.
Aktianik niuerfiit marsimi 2020-mi ajornartorsiortorujussuanngorput, coronap tuniluunnera nunarsuaq tamakkerlugu nappaalaninnguummat, kisianni piginneqataassutit aktiat nalingi ukiup ingerlanerani kingusinnerusukkut noqqillaammipput ukiullu aallartinneranut sanilliullugit nalinginnaasumik pitsaanerujussuarmik inissisimaffeqalerlutik.
BankNordik aningaaseriviit aningaasatigut niuerfinni isertitaqarnerunermik innersuussisut ilagaat, ukiumut angusarineqartussanut naatsorsuutit qaffanneqarsinnaanngornerat qanittukkut nalunaarutigigamiuk.