Grønlandsbanken pitsaanerni inissisimavoq
Grønlandsbanken aningaaserivinni pitsaanerpaat tulliattut inissittoq, atuisut nittartagaata moneytalk.dk-p, aningaaseriviit qajannaannerpaat pillugit naatsorsuinerani takuneqarsinnaavoq.
Grønlandsbanken misissuinermi Nykredit Bankimit taamaallaat qaangerneqarsimavoq. Misissuinermi aningaaseriviit akiliisinnaajunnaarnissaq pinngitsoortinniarlugu aningaasaateqarneranik misissorneqarsimavoq.
Aningaaseriviit annerit, soorlu Danske Bank aamma Jyske Bank nr 6-tut nr 10-tullu misissuinermi inissinneqarsimapput.
Ernumasoqarnissaanut pissutissaqanngilaq
- Aningaaseriviit allerpaatut inissinneqarsimappat ernumasariaqanngilatit. Danskit aningaaserivii tamarmik aningaasaateqarnissamut piumasaqaatinik immikkut ilisimasalinnit inissinneqarsimasunik naammassinnissimapput, taamaalillutik atuisut pitsaasumik inissisimanissaat anguniarlugu, Moneytalk.dk tusagassiutinut nalunaaruteqarpoq.
Misissuineq atuisunit attuumassuteqarpallaanngilaq. Aningaaserivinni 750.000 koruunit imaluunniit 100.000 eurot tungaannut aningaasaliinissamut qularnaveeqqusiinissamut aningaasaateqarfimmit qulakkeerneqarsimasarmata.
Misissuineq
Misissuinermi aningaaseriviit aningaasaateqarneri procentinngorlugit (akiliisinnaassusermi procenti), aningaasat taakku aningaaserivimmiititat aningaasanut nalorninaatilinnut aningaasaliinernut nallersuunneqartarput. Nalorninaatillit aningaasaatinut amerleriaatigitinneqartarput, taamaasillutik aningaaseriviup atugai ilanngullugit misissorneqarsinnaaniassammata. Nalorninaateqarnerusunik aningaasanik attartornerup nalorninaateqarluni aningaasaateqarneq annertunerulersittarpaa, taamaasilluni aningaaseriviup aningaasaateqarnerunissamut piumasaqaateqarnerulertarluni.