Grønlandsbankeni 65 millioner kroninik sinneqartoorpoq

Tamanna kvartalimut nalunaarusiami pingasunngormat saqqummiunneqartumi takuneqarsinnaavoq.

Angusat 2008-imi taamaalinerani angusaniit pitsaanerulaarput, taamanikkut 62,3 millioner kroniusimagamik.

Aingaaseriviup pisortaata Martin Kviesgaardip ineriartorneq naammagisimaarpaa.

– Aningaasaqarnikkut ajornartoorneq suli malunnarmat atuakkat allanngorartuarput, taamaattumik uagut angusagut naammagisimaarpagut. Naggataatigut angusagut 2008-imi taamaalineranut naapertuupput, sulili 2007-imiit appasinnerulaarlutik. Aningaasarpassuarnik Bankkakke1-imut akiliinikuuvugut, pappiaralli aningaasanik nalillit 2008-imi annaasaqaatiginikuunngilagut, Martin Kviesgaard tusagassiorfitsigut nalunaarummini allappoq.

Aningaaserivik kvartalimi pingasuni taarsigassarsianik qularnaveeqqusiissutinillu nalikilliligassaqangaatsiarsimanerarpaa. Tamaasali aningaaseriviup Bankpakke 1-imut peqataameranut attuumassuteqarnerarlugit.

Bankpakke taanna Danmarkimi naalakkersuisut 2008-imi ukiakkut aaqqissuussaraat ilaatigut Roskilde Bankip aningaasaataaruttoornerani qularnaveeqqusissutinut atugassatut.

– Kalaallit Nunaanni sullitatta akiliisinnaanerisigut annertunik ajornartorsiuteqannginnera pingaartuuvoq, aningaaseriviup pisortaa erseqqissaavoq.

– Naartsorsuutitsigut takuneqarsinnaavoq angerlarsimaffiit aningaasaqarneri aningaasatigut ajornartoornermit eqqugaarpiarsimanngitsut. Kalaallit Nunaanni appariartoqalaarsimanera ukiuni kingullerni malunnartoq pingaartumik Kalaallit Nunaanni, Danmarkimisuulli suliffissaaleqisoqarneranik peqquteqarpoq. Ernialli appariarnerat suliffeqarfinnut sullitanullu nalinginnaasunut iluaqutaavoq, Martin Kviesgaardtikkuaavoq.

Angusat 2008-mit pitsaanerusut

Grønlandsbankip taarsigassarsiarititai 2,69 milliarder kroniupput, 2008ip naaneranisut iinnangajallutik. Unerartitallu 396.657 kroninik ikileriarlutik 2,89 milliarder kroninngorsimapput. Appariarnermut pisortat unerartitsinnginnerulernerat pissutaanerpaajulluni.

– Taarsigassarsiat allanngunnginnerat ilimagisatut iinnangajappoq. Tassunga pissutaavoq aningaaseriviup taarsigassarsiarititaasa 2008-ip tungaanut amerleriarujussuarsimanerat, Martin Kviesgaard tikkuaavoq.

– Tamatumunnga pissutaavoq pappiarat aningaasanik nalillit annikitsumik annaasaqaataanissaat ilimagisimagatsigu. Aningassanulli sukangasuumik inatsiseqarpugut inuiaqatigiillu annikitsumik qaffakkiartornissaat iliamagisimallutigu, taamaattumillu kvartalini aggersunik inuiaqatigiit imatorsuunngitsoq qaffakkiartornissaat illimagaarput, Martin Kviesgaard erseqqissaavoq.