Henrik Leth: RAL imminuinnaq eqqarsaatigivoq
Royal Arctic Linep Kalaallit Nunaata aamma Danmarkip akornanni angalanissamut pilersaarutaa nutaaq, Polar Seafoodip naammaginartinngilluinnarpaa.
- Aajja, aammaasiit!
Royal Arctic Linep Nunatta aamma Danmarkip akornanni angallassinissamut pilersaarutimigut annertuunik allanngortitsinissaminik nalunaaruteqarmat, Polar Seafood Danmarkimit taama oqartoqarpoq. Nunatsinni tamarmi angallassisarneq allanngortilluinnarneqarmat Islandimiunik Eimskipimik assartueqateqartalernermut atatillugu taamanimiit ukiut pingasut qaangiutiinnartut pilersaarut nutaaq saqqummiunneqarpoq. Pilersaarut nutaaq malillugu Royal Arctic Linep aamma Eimskipip umiarsuaat assartuinerminni siunissami Tysklandimut aamma Tuluit Nunaannut aqqusaartalernerannik kinguneqassaaq.
Aviisi Sermitsiaq taama allappoq.
Polar Seafood Danmarkimi pisortamit Henrik Lethimit isornartorsiuineq sakkortuvoq:
- Angalanermut pilersaarummi nutaami pitsannguutit takujuminaatsippavut. Tassa Royal Arctic Linep tungaanit taamatunaasiit pisoqarpoq, umiarsuaatileqatigiiffik imminuinnaq eqqarsaatigaaq, sullitami pisariaqartitaat pinnagit. Umiarsuaatileqatigiiffiup angalanermut pilersaarut nutaaq tusarniaassutigisassanngortikkaluarpaa, kisianni uagut aalajangiinerup tamatuma sunniuteqarfiginissaa periarfissaqarfigisimanngilarput. Umiarsuaatileqatigiiffiup sullitami isumaasa tusarnissaat soqutigilluaruniuk, soorlu assersuutigalugu allanik pilersaarutinik assigiinngitsunik arlalinnik saqqummiussisimassagaluarpoq, Henrik Leth oqarpoq.
Naatsumik oqaatigalugu angalanissamut pilersaarutissami nutaami Tukuma Arctica, Dettifoss aamma Bruarfoss, ullut 14-ikkaarlugit paarlattaallutik angalasassapput, arriinnerusumik ingerlaartassapput, kisianni aammattaaq sivisunerusumik, orsussamut minguttuumut EU-p nutaamik akitsuutai naammassiniarlugit.
Aviisimi Sermitsiami atuarnerusinnaavutit. Aviisi uani pissarsiarisinnaavat:
