Hjörtur Smarason soraarsitaanini pillugu: Danmarkimi illorput tuniniarlugu aallartileruttorluta
Visit Greenlandimi pisortaanerup soraarsitaanini paasisinnaanngilaa. Tamanna inuit attaveqaqatigiittarfiisigut saqqummiussaani atuarneqarsinnaavoq. Suliamut atatillugu eqqartuussissuserisoq suliakkinneqarsimasoq, taassuma Sermitsiaq.AG-mut oqaluttuaraa.
Angalaneq taamaatippoq. Slut på rejsen. Sådan begynder Hjörtur Smarason Visit Greenlandimit soraarsitaanini pillugu LinkedIn-ikkut saqqummiussani tamaatut aallarnerlugu allappoq.
- Ullumi nalunaarutigisussaagaluarpara, Danmarkimi illorput "Tuniniarlutigu", isumaqatigiissutigalu malillugu ukiuni kingullerni marlunni Kalaallit Nunaanniissarput aalajangiussimagaluarlugu. Ajoraluartumik isumaqatigiissutiga ullumi atorunnaarsinneqarpoq, soorunam uannut tamanna annertuumik tupaallatsitsisimavoq.
Hjörtur Smarasonip ukiumi ataatsimi pisortaanerusimasup Sermitsiaq.AG-mut oqaatigaa, soraarsitsineq paasisinnaanngisani pillugu oqaaseqarsinnaanani, suliarli eqqartuussissuserisumut suliassanngortissimanerarpaa.
Piujuartitsinissamik tunngaveqarpallaarsimanngitsoq
Soraarsitsinermut tassanngaannartumik nalunaarutigineqartumut tunngavilersuutigineqarsimavoq, ingerlatseqatigiiffimmit ”Kalaallit Nunaanni takornariartitsisarnermik inuussutissarsiuteqarnerup piujuartitsisumik ineriartortinneqarnissaa ukkatarerusunneqartoq”.
- Ajoraluartumik tamatumannga aqutsisut salliutitsisimanerat siulersuisuni tatigineqarsimanngilaq, soraarsitsineq pillugu tusagassiorfitsigut nalunaarummi allassimavoq.
Pisortaanerusimasup Linkedinikkut saqqummiussamini, ukiuni kingullerni suliarisimasami lai allattorsimavai.
- Monocle, Euronews, Washington Post, Newsweek allarparpassuillu aqqutigalugit Kalaallit Nunaanni piujuartitsisumik takornariartitsisarnerup ineriartortinneqarnissaanut periarfissatsialaat saqqummiuttarsimavavut.
Kalaallit Nunaat takornariarfissatsialattut Times-imi, CNN-imi, New York Times-imi aamma National Georgraphic-imi saqqummiunneqarsimavoq.
- Kalaallit Nunaanni piujuartitsinermik tunngaveqarneq aamma Kalaallit Nunaanni inuiaqatigiinni suut ajunngitsuunersut ukkataralugit piujuartitsisumik ingerlatsinissaq ukkatarisimavarput.
Anguniagarisimavarpullu: Kalaallit Nunaata ukiut qulikkuutaat naannginneranni nunarsuarmi tikitassatut piujuartitsinerpaajusutut pilerinarsarneqarnissaa!
Siulittaasup tullia pisortaaninngortikkallarneqartoq
Visit Greenland soraarsitsinermut atatillugu pisortaanerugallartussamik toqqaasimavoq. Siulersuisuni siulittaasup tullia Anne Nivíka Grødem pisortaaninngorallartinneqarsimavoq.
Før Hjörtur Smarason 2021-mi apriilip qaammataani pisortaaninngunngikkallarmat, pisortap tullia Mads Skifte, pisortaanerusimasoq Tine Pars ukiumi pineqartumi februaari naalersoq tunuartoq taarserlugu pisortaanerugallartutut atorfinitsinneqarsimavoq, maannalu ingerlatseqatigiiffimik pisortaanissamik nutaamik pissarsiniaqqittussanngorluni.
- Ukioq aallartillugu pitsaalluinnartumik oqaaseqarsimavunga. 2019-imi takornariarsimasut amerlaqqataannik 2024-mi takornariaqarnissamik anguniagaqarnerput utaqqinagu 2022-mi tamanna anguniassagipput oqaatigingakku. Martsip aatsaat naalerpoq, kisitsisilli takutippaat takornariarpassuaqalereersimasoq, inniminniisoqartarneratalu sorsuuteqarnissarput ilimanartutut takutinngilaa, takornariartitsisarnerulli iluani aatsaat taamak ukioq manna takornariaqartigisoqarniartoq kisitsisitigut takuneqarsinnaavoq, Iluatsitsineq, pisortaanerujunnaartoq LinkedIn-ikkut inuulluaqqusilluni allappoq.