Hotel Narsarsuarmi aqutsisut taarseneqarput

Hotel Narsarsuaq siunissami ingerlatsinermik isumaqatigiissuteqarnikkut ingerlanneqartalissaaq.

Mittarfeqarfinni aqutsisut akornanni hotelip ingerlanneqarnera aningaasaqarneralu pillugit oqallisigineqareersut taama aalajangertoqarpoq.

Hotelip qaammatini tulliuttuni niuernermut pissutsinut naleqqussarnissaq pingaarnertut suliassarissammagu, nalilerneqarpoq allanik ingerlatsisoqalissasoq.

Tamassuma kinguneraa hotelip ingerlatsisua Charlotte Hellegård ullumimiit atuutilersumik atorfimminit soraarsitaammat.

Tassalu Hotel Narsarsuaq 1. juli 2014-imit aappariinnit Ernst aamma Rina H. Lundikkunnit ingerlatsisuuffigineqalissaaq, taakku Mittarfeqarfiillu ingerlatsinermik isumaqatigiissusioqatigiissimapput. Rinap Ernstillu 1. juli Narsarsuarmi inissinnissaata tungaanut, hoteli Mittarfeqarfiit hotelinut ingerlatsisuanit Bauer Johansenimit ingerlanneqarallassaaq.

- Nassuerutigisariaqarparput uagut mittarfeqarfinnik ingerlatsinermik suliaqartuusugut hotelinik ingerlatsineq pikkoriffiginerpaannginnatsigu. Tamanna pissutsit ilagaat maanna hotelip ingerlanneqarneranut aningaasaqarneranullu akisussaaffik, ingerlatsinermik isumaqatigiissusiornikkut aappariinnut tunniussimalluaqqissaartunut sumiiffimmilu najugaqareersunut, Narsarsuarmilu hotelimik ingerlatsinermut nutaanik anguniagaqarusuttunut tunniussimagatsigu, Mittarfeqarfiit attaveqatigiinnermut ingerlatsisuat Hans Henrik Lichtenberg oqarpoq.

Narsarsuarmi innuttaasunit Hotel Narsarsuarmi sipaarniartoqarnera pillugu aalajangerneqarsimasut akerlerineqarput akunnerup naanerani. Hotelip ingerlanneqarnera Mittarfeqarfinnut iluanaarutaanikuunngisaannarpoq. Sipaarniartoqarnera pissutaalluni hotelimi sulisunik soraarsitsisoqassaaq.