Hotel Qaqortup isertitai amerliartorput
Hotel Qaqortoq 2023-mi ukiup siulianut sanilliullugu sinneqartooruteqarnerulersimavoq. Piginnittup pisortaasullu Jim Riisip nassuerutigaa ingerlatseqatigiiffimmiit unioqqutitsilluni 200.000 koruunit missaannik imminut taarsigassarsitissimalluni. – Tamanna ajorpoq, taanna nassuerpoq
Jim Riis ingerlatseqatigiiffimminit unioqqutitsilluni taarsigassarsisimanini nassuerutigaa. -
Tamanna ajorpoq. Kukkunersiuisup oqaloqatiginerata kingorna pissutsit iluarsineqangajalerput,
taanna oqarpoq.
Sermitsiaq arkiv
1Hotel Qaqortoq siorna akileraarutit suli
ilanngaatiginagit 2,3 millionit koruuninik sinneqartooruteqarpoq. Tamanna
2022-mit 312.000 koruuniinnaasimasumit pitsaanerungaarpoq.
Naatsorsuutit saqqummiunneqaqqammersut naapertorlugit
siorna sinneqartoorutit 16,2 millionit koruuniupput, ukiup siuliani 12,9
millionit koruuniullutik. Kaaviiaartitat ingerlatseqatigiiffiup
ilisimatitsissutiginngilai.
Akunnittarfiup kaaviiaartitai isertitaalu 2023-mi
pingaartumik pikkorissartunut ataatsimeersuartartunullu aamma Qaqortup
Mittarfianik sanaartornermut aatsitassarsiornermullu suliffeqarfinnut
sullitanut tunngassuteqarput.
PISARTAGAQARTUNUT
Allaaserisaq una Nutaarsiassaqartitsivimmi aviisit naqitat ilaanni allaaserisaavoq.
Allaaserisat pisartagaqartunit siunissami taamaallaat atuarneqarsinnaajumaassapput.
Atuarluarna
Akunnittarfiup pisortaa piginnittuali Jim Riis,
Sermitsiamut taama oqaluttuarpoq.
- 2023-mi unnuinerit amerlanerpaapput, ukioq mannalu
qaammatini siullerni unnuinerit amerlanerunissaat ilimanarluinnarpoq, taanna
oqarpoq.
Annertuumik allilerisut
Hotel Qaqortumi 46-nik initaqarpoq 30-llu missaannik
sulisoqarluni. Pilersaarut malillugu ininik 18-inik allilerinissamut titartakkat
pisortat tigoqqammerpai.
Ukiup ataatsip matuma siorna Sermitsiamut
ilisimatitsissutigaa aningaasaliissutit 20-25 million koruunit
missaanniissasut.
Hotel Qaqortoq 64-inik initaqalernermini suli Nuummi
ingerlatseqatigiiffimmit Hotel Hans Egedemit, marlunnik akunnittarfiuteqartumit
aamma Ilulissani Hotel Arcticimit akunnittarfinnik marlunnik ingerlataqartumit
suli mikinerussaaq.
- Ukioq manna alliliineq aallartissavarput, 2024-llu
qiteqqunnerani naalerneraniluunniit naammassineqassaaq. Suliassap qanoq
akeqassaneranik suli ilisimatinneqarsimanngilanga, Jim Riis oqarpoq.
Taamaalilluni
Qaqortup mittarfiata 2025-p aallartinnerani ammarnissaanut akunnittarfiup
piareersarnissani piffissaqarfigilluarpaa. Mittarfik tikeraartunik
unnuiniartunik nassataqassagunarpoq.
- Siorna juulimi tikeraat amerlanerpaaffigaat. Mittarfik
ammarpat takornariaqarnerulernissaq anguniagaraarput, pisortaq oqarpoq.
Taarsigassarsineq inatsimmik unioqqutitsisoq
Aktiaatilittut imaluunniit piginneqataasunut
taarsigassarsisitsisarneq, ullumikkut piginneqataasunut
taarsigassarsisitsisarnertut taaneqartartoq, ingerlatseqatigiiffinnut inatsit
naapertorlugu inerteqqutaavoq, akileraarusersuinermullu inatsit naapertorlugu
akileraarusersuinermut pisussaaffiliivoq.
Assersuutigalugu piginneqataassuteqaruit immaqalu
piginneqatigiiffimmi ingerlatsivimmi pisortaaguit, suliffeqarfimmik
ingerlatsisuullutit, aningaasanik amigaateqaruit piginneqatigiiffimmit
taarsigassarsiinnarsinnaanngilatit.
2023-mi maajip aallartinnerani Jim Riisip
ukiorpassuarni suleqatigisami Henrik Myrhøj Christensenip piginneqataassutai
pisiarai.
2023-mi Jim Riis Hotel Qaqortoq ApS-imi 202.000
koruuninik taarsigassarsivoq.
Piginneqatigiiffiata tamakkiisumik pigisaata
ingerlatseqatigiiffinnut inatsimmi aningaasanik piginnittumut
taarsigassarsititsinermut aalajangersagaannik aamma akileraartarnermut
inatsimmi aalajangersakkat unioqqutippai. Kukkunersiuisup isornartorsiuilluni
oqaaseqaataani tamanna allassimavoq.
”Ingerlatseqatigiiffiup ingerlatseqatigiiffinnut
inatsimmi paragraf 210, imm. 1 unioqqutillugu ingerlatseqatigiiffimmi
piginnittut ilaannut taarsigassarsititsisimavoq, tassanilu aqutsisut
akisussaatinneqarsinnaapput. Ingerlatseqatigiiffik aningaasanik nuussinermini
akileraartarnermut inatsit malissimanngilaa, pisortallu tassani
akisussaatinneqarsinnaapput.”
Kukkunersiuisoq naalagaaffimmi akuerisaq Per Jansen,
nunatsinni kukkunersiuisarfiit annerit ilaannit Grønlands Revisionimeersoq,
Hotel Qaqortup attuumassuteqanngitsumik kukkunersiuisua, 2023-mut
naatsorsuutinut oqaaseqaammi taama oqarpoq.
Pisortap nassuiaataa
- Nammineq suliffeqarfiutigaara. Ilaatigut
aningaasanik akissarsianut allagartanik aamma akissarsianut taarsiullugu
nuussisarpunga. Akiligassaqaraangat aningaasanik uannut nuussisarpunga.
Naatsorsuutikka tamakkiisumik ammasuussapput. Ilinniassavara qanoq
iliorsinnaatitaanerlunga aamma qanoq iliorsinnaannginnerlunga, Jim Riis
nassuiaavoq.
Unioqqutitsillutit taarsigassarsivit?
- Aap, marlussoriarlunga puigugaqarlungalu
sukkavallaartumik iliuuseqarsimavunga. (Kukkunersiuisumit, aaqq.)
oqarfigineqarpunga, taanna nassuerpoq.
Aningaasat taakku nuussimasani pisortatut
aningaasarsiarisartakkaminut sanilliullugit amerlanngitsut, Jim Riis
isumaqarpoq. Taassuma akunnittarfimmi ingerlateqatigiiffimmut 2023-mut
naatsorsuutit naammassinerannut atatillugu kukkunersiuisumik pitsaasumik
oqaloqateqarsimasoq, taanna nangilluni oqarpoq.
- Tamanna ajorpoq. Taamaaliorpunga, kisianni
pututitsiniartoqanngilaq. Kukkunersiuisup oqaloqatiginerata kingorna pissutsit
iluarsineqangajalerput, Jim Riis oqarpoq.