borgmesterit
IA borgmesterinik malersuisoq: Dorph Wæverilu niuernermik ingerlatsissanngillat
IA-p borgmesterit namminneq suliffeqarfiutiminnik ingerlatsisarnerat inerteqqutaalersikkusuppaa; siunnersuummilu borgmesterit Siumumeersut eqqugaassapput. IA-kkormiut naapertorlugit, 918.000 koruuninik aningaasarsiaqarneq naammattariaqarpoq
Inuit Ataqatigiit borgmesterinik eqeersimaartunik, namminerisaminnik aningaasarsiortunik, nuannarinninngillat.
Tamanna siunissami inerteqqutaalersinneqartariaqarpoq.
Ane Hansenip taamaalilluni ukiakkut ataatsimiinnissamut siunnersuutigaa, Naalakkersuisut borgmesterit borgmesteritut atuuffimmik saniatigut allanik suliffeqarnissaannik inuussutissarsiutinilluunniit ingerlataqarnissaannik pinngitsoortitsissutaasunik inatsisiliornissaannik peqquteqassasut.
Atuaruk: KNR: Wæver aamma Hardenberg imermik suliniuteqartut
Borgmesterit marluk
Siunnersuut tapersorneqarpat tamanna aappaagumiit atuutilissaaq – inuillu soqutigisatik aallukkumallugit aningaasarsiorluarumallutillu suliniuterpassuarnik aallartitsisartut Siumumeersutut Ole Dorphitut Jørgen Wæver Johansenitullu ittut saniatigut suliffeqarnissaat suliffeqarfinnilluunniit namminneq pigisaminnik ingerlatsinissaat pisinnaajunnaarsillugu.
Ole Dorph akunnittarfimmik nammineq pigisamik ingerlatsisimavoq, Jørgen Wæver Johansenilu ilaatigut immiaarali- ornermut akuusimalluni piffissamilu kingullermi Svend Hardenberg peqatigalugu Greenland Investilu aqqutigalugu suliffeqarfimmik namminersortumik imermik pitsaalluinnartumik Qeqertarsuarmeersumik tunisassiortussamik pilersitsinissamik pilersaarutinik suliaqarsimalluni.
Soqutigisat aporaannerat
Ane Hansenip naalakkersuisunut ilaasortat aalajangersakkanit taama ittunit killiliivigineqareersimanerat tikkuarpaa.
- Soqutigisat aporaassinnaanerannut aarlerinaammik killiliinissaq tamatumunnga tunuliaqutaavoq, tassunga ilanngullugu inuttut soqutigisat atuuffimmik ingerlatsinermut sunniuteqarsinnaanerannut aarlerinaateqarneq pissutigalugu, ilaatigullu atuuffimmik isumaginninnerup piffissaq tamakkerlugu isumaginninnissaq tamakkiisumillu aallussillunilu tunniusimanissamik qulakkeerumaneqarluni, Ane Hansen erseqqissaavoq.
Allaaserisaq tamaat AG-mi uani saapatip akunnerani saqqummertumi atuaruk, uani aamma pisiarisinnaavat: