IA- MSC-mik nalunaaqutsiisarnissaq kissaatigaa
Piujuartitsinermut nalunaaqutsiussaq aalisakkanut tunngatillugu nunarsuarmi unammilleqatigiinnermi pisariaqarpoq, Juliane Henningsen Aleqa Hammondimut akissuteqarluni erseqqissaavoq.
Siumup siulittaasuata Aleqa Hammondip aalisakkat MSC-mik nalunaaqutserneqarnissaasa iluaqutissartaa qularaa. Aalisakkat tunisassiat taamatut nalunaaqutserneqarsinnaapput siunnersuisoqatigiit isumaqarpata aalsakkat piujuartitsineq tunngavigalugu pisarineqarsimasut. MSC-mik nalunaaqutsinneq sammineqalersimavoq atuisartut isumaqarmata aalisakkat tuniniarneqartut MSC-mik nalunaaqutserneqarsimanngitsut pisiarineqartariaqanngitsut.
Tamanna Aleqa Hammondip uppernarsarneqartikkusuppaa. Tamannali pisariaqanngilaq, IA-miit Juliane Henningsen isumaqarpoq.
Aamma tikkuarpaa MSC-mik nalunaaqutsiinerup siunertaa nunatsinni aalisarnermut iluaqutaassasoq, aammaliaalisakkat MSC-mik nalunaaqutserneqangnitsut tuniniarnissaat pisariaqanngitsumik immeraannerusoq.
- Siumup pisaassanik qaffaaqqusinera akuerineqassasuuppat tamanna piujuartitsinngitsumik uungaannarlu isigaluni iluanaarniarnertut nalilerneqassagalluarpoq, tamannalu inuiaqatigiinnut ajoqusiissaaq. Piffissanngporpoq nunatsinni nunani allanisuut piujuartitsilluni aalisarnermik poltikikkeqalernissaq, Juliane Henningsen tusagassiuutitigut nalunaarummi allappoq.
Taanna naapertorlugu nunat 62-iniit amerlanerusut tunisassiallu 3.8000-niit amerlanerusut MSC-mik nalunaaqutserneqarsimapput.
- Nalungnilarput Europami atuisut nunarsuup sinneranisuut nioqqutissanik sunik pisinerlutik ilisimaarigaat. Piujuartitsineq aallaaviuvoq, taamaattumik sutigut tamatigut nunarput iliaritittariaqarparput piujuartitsisumik minguitsumillu tunisassiortutut. Pingaartoq alla tassaavoq ullumikkut niuertarfiutileqatigiippassuit piumasarinersimagaat MSC-mik nalunaaqutaqarnissaq, arlaitsigullu niuertafiutileqatigiissuit pisiffigisartakkatik taarsertarlugit atuisartut piumasaannik naammassinnissinnaanngitsut. uagullu nioqquteqartartutut pissutsit piviusut isiginiartariaqalerpavut, Juliane Henningsen oqarpoq.