Icelandair juulli sioqqullugu – siumoortumik
nalunaaruteqaqqaarani – Kulusummut timmisartuussisarunnaarniarluni
aalajangerpoq.
Tamanna Tunumi innuttaasunut erloqinartorujussuuvoq – taakkumi
misigisimagamik Nuummi mittarfittaap nutaap ammarnerata kingorna Nunatsinni
timmisartuussisarnerup allannguuteqarujussuarneranit eqqugaallutik.
Icelandair juulli sioqqullugu – siumoortumik
nalunaaruteqaqqaarani – Kulusummut timmisartuussisarunnaarniarluni
aalajangerpoq.
Tamanna Tunumi innuttaasunut erloqinartorujussuuvoq – taakkumi
misigisimagamik Nuummi mittarfittaap nutaap ammarnerata kingorna Nunatsinni
timmisartuussisarnerup allannguuteqarujussuarneranit eqqugaallutik.
Hjørdis Viberg Tasiilameersoq, Icelandairip
taama aalajangeriasarneranit nammineq eqqugaasoq taama oqarpoq.
Taassuma angajoqqaani juullisioqatigereerlugit
maannakkut Savalimmiuniippoq.
- Januaarip qulinganni Keflavikimut
aallarnissara pilersaarutaagaluarpoq januaarillu aqqarnganni Kulusummut
ingerlaqqissallunga. Icelandairilli Kulusummut timmisartuussisarnini
taamaatimmagu pilersaarutit taamaatiinnarneqarput.
- Københavnimut maanna
timmisartortariaqalerpunga tassanilu unnuissallunga. Aqaguani Nuummut
timmisartortariaqarpunga, januaarillu 16-ianni aatsaat Kulusummut
ingerlaqqissinnaallunga. Unnuinissarpassuit nammineq akilertariaqarpakka, naak Keflavikimit
Kulusummut bilitsimik atuuttussamik akileriikkannik bilitseqaraluarlunga.
Piffissamik aningaasanillu asuli atuineq
- Bilitsit qaammatit arlallit matuma
siornagulli pisiarereerakkit. Bilitsit nalinginnaasut pisiarigakkit, tassa
nittartakkakkut akikitsunik neqerooruteqannginnamik. Taamaattumik Icelandairip
bilitsip akia utertippaa, immikkulli aningaasartuuteqarujussuassallunga –
aammami piffissarujussuarmik aamma atuiffigissavara.
- Savalimmiunit Tunumukarniarlunga Danmarkimut
timmisartoriarlunga sermersuaq marloriarlugu qulaallugu angalasariaqarnera
sianiilliornerulaarpoq. Tamanna CO2-mik mingutsitsinermut iluaqutaavallaanngilaq.
- Maannakkut tamanna anigorsinnaassavara.
Kisianni Icelandairip Kulusummut timmisartuussinissani taamaatiinnarmagu
Tasiilamut illoqarfiullu niuertarfiinut sakkortuumik eqquivoq – tamannalu
ernummatigeqaara.
- Ukiuunerani pilersorneqarnitta ilarujussua
Reykjavikimit timmisartukkut pisarpoq. Nuummiimmi Reykjavikimut qaninnerugatta,
taamaammat eqqugaasorujussuussaagut.
- Pilersuinerup isumannaatsuuneranut aamma
sunniuteqarpoq, sermersuarmimi silarlukkaangat Icelandair Kulusummut
missinnaajuaannarsimavoq – illuatungaatigullu Islandip Kalaallit Nunaatalu
akornanni silarlukkaangat, Air Greenland Kulusummut missinnaasarluni.
- Immikkut ittumik taama isumannaallisaaneq
maanna atorunnaarpoq. Tamanna uatsinnut ilungersunarpoq.
- Tasiilamit Ittoqqortoormiinut timmisartukkut
angalaneq suli ajornakusoornerulissaaq. Siornatigummi Keflavikimukariarluta
Akureyrimut timmisartortarpugut, tassanngaanniillu Nerlerit
Inaannukartarluta. Maanna Nuummut
timmisartoqqaartariaqalissaagut, tassanngaanniit Københavnimut –
Keflavikikoorluta – Akureyrimut – taavalu Nerlerit Inaannut.
Timmisartuussinerpassuussapput, akisussaaq – avatangiisinullu
pisariaqanngitsumik ajoqutaassalluni.
- Isumaqarpunga Icelandairimit
sumiginnarneqartugut. Takornariat angallannerisa nalaani Islandimit Tunumut
ilaasorpassuaqartarmat, Kulusummut timmisartuussisinnaassapput.
Timmisartuussisarnerit taamaatiinnarneqartut
ajuusaarutigaat
Icelandairimi taamaatitsiinnarnerit
ajuusaarutigaat, isumaqarlutilli taamaatitsiinnarnerit pinngitsoorneqarsinnaanngitsut, ukiukkummi
angalasartut ikippallaartarmata. Timmisartuutileqatigiiffiup attaveqaqatigiinnermut pisortaa Guðni
Sigurðsson mailikkut Sermitsiamut taama allappoq.
- Icelandair Kulusummut Kulusummillu
niuernikkut tunngavilimmik timmisartuussisarpoq, naalagaaffimmit
tapiissuteqarfigineqartarani. Ajoraluartumilli ukiukkut ilaasut
ikippallaartarput. Aqqut pineqartoq imminut akilersinnaassappat, ilaasartut
nassiussallu amerlinissaat pisariaqartipparput.
- Siorna januaarimi februaarimilu nunanit
tamalaanit Kulusuk aqqusaarlugu angalasut ikippallaarsimapput.
- Januaarimi februaarimilu 2025-mi Nuummiit
Kulusummut timmisartuussinerit siornamut sanilliullugit 30 procentit missaannik
amerleriarput, angalanerit inissallu eqqarsaatigalugit. Taamaattumik
timmisartuussinissavut naleqqussartariaqaratsigik, timmisartuutitta
isumalluutittalu akilersinnaasumik atornissaat qulakkeerumallugu
– Piffissap taamaalinerani ukiuni kingullerni inniminniinerit taama
ikitsigisartut amerlinissaat neriuutigisaraluaratsigu, ajoraluartumik
akerlerluinnaanut ingerlavoq, ilaasut ikiliartuinnarlutik.
- Ilaasut taamaatitsiinnarnermit eqqugaasut
Icelandairimit ikiorneqarput, angalanissaminnut pilersaarutaannik
allanngortitsinissaannut ornigassaminnut apuussinnaaniassammata,
attaveqaqatigiinnermut pisortaq taanma akissuteqarpoq.
