Ikkarlinnerup usit kinguaattoortissavai
"Vega Sagittarius’" ikkarlinnerata nassiussat ingeralaarnerat kinguaattoortissavai, RAL ilisimatitsivoq
Upernavimmut, Uummannamut, Aasiannut, Sisimiunut nunaqarfinnullu nassiussat containerinik angalassisup "Vega Sagittarius"-ip sisamanngornermi Nuup kitaani ikkarlinneranit pissuteqartumik kinguaattuussapput.
RAL-ip manna tikillugu ilisimatitsissutigisinnaanngilaa umiarsuaq aamma usit qanoq pinissaat. Aamma ilisimaneqanngilaq kinguaattoornerit qanoq sivisussuseqassanersut.
- Royal Arctic Line umiarsuup piginnittuanit qanoq ingerlariaqqittoqarnissaanik kalerriisoqarnissaa utaqqimaarpaat, taakkualu misissuereerpata usit qanoq pineqarnissaat paasineqassaaq, kalaallit nassiussanik isumaginnittoqarfiat sisamanngornermi nalunaaruteqarpoq.
Umiarsuaq 139 meterinik takissusilik Royal Arctic Linemit attartugaasoq nal. 08.30 missaani nalunaarutigaa Nuup kitaani 12 sømilinik avasissusilimmi ikkarlippoq.
Sisamanngornermi ualikkut umiarsuaq imassimanngitsoq nalunaarutigineqarpoq naak naqqa ikkarlinnermit putusimagaluartoq.